Rongchii 14 nungi Monupii 5 tashi “Gram Swaraj Abhiyan” sentong alitsü

Dimapur, Rongchii 15 (TYO): “Gram Swaraj Abhiyan” (Village Self-Governance Campaign) nüngtem nung Chief Secretary indang Conference Hall nung Rongchii (April) 13, 2018 nü osangbener den senden ka amen. Iba sentong ya Home Secretary, Rovilatuo Mor, IAS shiba iba Campaign atema Nodal Officer lir, pai ketdangsüa agi.
Yimdaklirtem jenjang ajungkettsü mechi Government of India-i sentong aika tenzükogo, saka department balalai iba sentongtem inyakba mapang tanga department-i inyakba mejangjaba yong iba sentongtem inyakba mapang taginüba ama mayimjemteter, ta Robilatuo-i ashi.
Anungji Government of India-i “Gram Swaraj Abhiyan” sentong ya benok, kong agency aser department ajak longjemer pei inyakyim mapatem lemsateptettsü, ta Home Secretary-i ashi.
Rongchii 14, 2018 nü Department of Social Welfare ajanga Dr. B.R. Ambedkar asoba anogo bilemteta amungtsü aser iba sentong ya National aser District level nung amungts. Iba sentong nung shilem agitsü asoshi school, college aser tanga department tem jaoktsü, ta pai metetdaktsü.
Rongchii (April) 18, 2018 nü PHE Department aser District Administration longjemer state nung merikmejuba sentong ka Gram Panchayat ajak nung agitsü, talisa Open Defecation Free (ODF) maliba nung agitsü.
Rongchii 20, 2018 nü Department of Food & Civil Supplies aser Chief Electrical Inspectorate (Department of Power) ajanga sentong ya ayongzüktsü, kong Ujjwala Panchayat sentong atema yimtsüng 838 jangjateta lir. Iba department ajanga LPG gas cylinder aser LED bulb tem alemtsü asoshi sentong ayongzüktsü.
Rongchii (April) 24, 2018 nü Department of Rural Development ajanga state level VDB & Village Council mungdang ayongzüktsü, kong züngsem 6000 shi arua adentsü imlar. Iba mungdang nung shisalen sayur ya tanga state tem nungi anir arutsü.
Rongchii (April) 28, 2018 nü Rural Development ajanga Gram Shakti Abhiyan (Block/ District beneficiary Sammelan/ recognition) sentong ka ayongzüka agitsü. Iba anogo district level nung teyari angur nem Pradhan Mantri Awas Yojana, Pradhan Mantri Sobhagya Yojana amala tongtibang scheme tem indang teyari agütsütsü.
Department of Health & Family Welfare ajanga Rongchii (April) 30, 2018 nü Ayushman Bharat Abhiyaan sentong ayongzüka agitsü, kong Gram Panchayat level senden nung Medical Insurance/Ayushmaan Bharat scheme aser vaccination, mother child care amala onüktem lemsateptsü. Iba scheme nungi teyari angutsü temsüa aliba kibongtem bendentsü asoshi drive ka agitsü.
Department of Agriculture aser Farmers Welfare ajanga Monupii (May) 2, 2018 nü Kisan Kalvaan Karvashala sentong ayongzüka agitsü. 2022 tashi nung aluyimertem sen ajangzükba shilem anasü agi timba kümdaktsütsü mechi iba sentong kübok awareness campaign aser training sentongtem Block level nung agitsü.
Monupii (May) 5, 2018 nü Aajeevika & Kaushal Vikas Mela ka ayongzüka agitsü. Iba sentong ya DAY – NRLM, DDU-GKY (Ministry of Rural Development) aser Ministry of Skill Development ajanga ayongzüktsü. Aajeevika Diwas ya National, State aser District/Block level nung ayongzüka akatsü, ta ketdangseri metetdaktsü.