Rongchii 21 nü social work alidang district ketdangsertemi ward ajunga semdangtsü

Dimapur, Rongchii 19 (TYO): Deputy Commissioner Dimapur, Sushil Kumar Patel, IAS-i Rongchii (April) 19, 2018 nü DC Dimapur indang conference hall nung Dimapur district nung aliba HODs ajak, administrative officers, GBs, Ward Chairmen, DMC, lokti tentet balala aser nübur tenzükertem senden ka jazüka menogo.
Iba senden nung, Cabinet ajanga telemtetba agia aliba nung ajemdaker Rongchii (April) 21 nü Gram Swaraj Abiyaan kübok state tesem ajak nung Mass Social Work akatsü aliba indang jembi.
Iba senden nung mendenpuba, Sushil Kumar Patel-i ashiba agi, iba social work ya anepdang 7:00 ako nungi tenzüka ward 23 prong nung alitsü.
Pai iba senden nung jembiba mapang, Dimapur district kübok aliba HODs ajunga dang pei department nung grade IV nungi tema mapa inyaker ajak iba social work nung kata mezüdoki dentaktsütsü ashi aser attendance sashia agitsü totuyuba agütsü.
Paisa GB union aser ward chairmen tem dang pei ward nung alirtem ajunga iba arok mapa inyakba nung shilem agidaktsütsü asoshi ketdangsütsü totuyuba agütsü.
Iba social work ya talisa tzüngluruwa metenzükdang kilentzü aoba lenmang merüktettsü asoshi lir, anungji nisung ajaki kotarang, bhelja aser kioktsü amala osettem bener arutsüla, ta pai iba senden nung metetdaktsü. Paisa DMC dang ward ajunga nungi jana bendentsü mapa nungloktsü.
Iba social work aliba mapang district administration ajanga ward ajak semdanga arutsü, ta Dimapur DC-isa metetdaktsü.
Iba senden nung Jain Samaj nungi adenertemi iba anogo Jain aser Marwari kin temi Jain Temple colony meriktsü aser parnok indang machinery tem dang amshitsü, ta ashi.
Rongchii (April) 21, 2018 nü iba social work aliba mapang iba kin ana nungi tetsür aser tanur densema inyaktsü, ta shiogo.