Rongchii 26, 2018 nü Nagaland nung NEPEx agitsü

Rongchii (April) 12, 2018 nü ATI nung Nagaland Emergency Preparedness Excercise (NEPEx) senden nung Home Commissioner, Abhishek Singh, IAS-i o jembidang agiba noks angur.

Dimapur, Rongchii (April) 12 (TYO): Rongchii (April) 12, 2018 nü ATI nung Nagaland State Disaster Management Authority-i Nagaland Emergency Preparedness Exercise (NEPEx) senden ka ayonga amen.
Iba senden ya Home department-i NDMA Government of India den yaritepa ayongzük.
Rongchii (April) 26, 2018 nü Nagaland State Disaster Management Authority (NSDMA) – Home Department ajanga Nagaland emergency preparedness exercise (NEPEx) indang mock drill ka agitsü. Iba ya National Disaster Management Authority (NDMA) den yaritepa agitsü sentong lir.
Kodangsa lendong ka atalokdir, lendong jagidang masü saka nisungtem merenemi aliba aser kiojen tashi mait yangluba ajanga takoksa jenti ajurur, ta Home Commissioner, Abhishek Singh, IAS-i tanü senden nung jembidang ashi.
Nagaland ya menoknok anokba tesemtem nung zone V kübok züngoker aser iba atema asenok renema alitsüla. Anungji, nisung aser kiojen kangabo makoksatsü atema mock drills agitsüla aser basic awareness agütsütsüla. Iba nung media-i tongti shilem agir anungji private media houses aser IPR Department-i iba osang prokshitsü ayongzüker, ta Abhishek-isa metetdaktsü.
Disaster Management ya department aser office tem nung dang masü saka nisung ajaki iba ya melamela metettsü atema website nunga agütsütsüla, ta paisa shisem.
Joint Advisor (Ops) NDMA Dhirendra Singh Sindhu-ia ashiba agi, State aser District nung Emergency Response Plans tendangtsü atema mega mock exercise agitsü.
Menoknok indang multi-State mock drill exercise ji Nagaland, Manipur, Tripura aser Mizoram kübok district ajak nung külemi agitsü. 1897 küm Shillong Menoknok nung ajemdaker State Level Mock exercise ji agitsü, ta Dhirendra Singh-isa metetdaktsü.
Sentong nung mendenji Dy. Commandant General Home Guards & Civil Defence Nagaland, Medozhalie Pienyu liasü, DGP Nagaland Rupin Sharma, IPS-i Incident Response System (IRS) indang osang lemsatep aser Dr. Hovital Sothu, Deputy Director ATI-ia Incident Response System (IRS) indang maparen metetdaktsü.