Rongjenseter

– Tarep Jamir, East Dimapur
Ayatai, ayatai, ayatai, kü taküm ya,
Koda taso mashi
Aküm li nung tesodakdak maka
Ammang sangwa memetet rongjenseter.
Medemsortembo anogoshia watidak washiteper
Saka kü takümbo yamaji masü.
Oba, tanü akümli nung na taküm lilasang.
Nia medemsortem den watidak tenla
Tanü nibo tangola sadokdak maka
Anaktena lungrangpang nung judaker
Ayako, ayako, ayako, ta rongjenseter.
Kü taküm nung tesayur tajungtibaji na liasü.
Yipru tesashi arudang ola madoki nokdaksangji na
Takar tulur kilempok nung aiben maksü ajurusangji na
Kechiaser kü jenjang tajungtiba kümdaktsünüdang
Nai item ajakji aremzük.
Oba, tanü ni chuba menden nung amenba ya
Ne tashi aser sarasadem tamang agi alangzük.
Anogoshia konang tetoshi nung dang liaka jangramatemer,
Kechiser nü tenüki tanü item sentsüwangshi mangur.
Taküm nung shisabulu tebilemtsü arudang
Anisüngzükdak maka na maliba agi
Pokpu ozu ama azüngmeyakdak mener
Asüktema rongjenseter.
Tanü alima rangbeni akümlir tebu nem konang tetutshi agütsüdang
Oba, nabo kodanga majeba lima nung
Merijangsa merijang kotak tenyartemi tushidaki
Oba atakatem masü, mezüngdangtetba temoatsütem dang anüng ali
Yanglusang Tsüngrem dang
Anogoshia meshizükjangma.

You must be logged in to post a comment Login