Rongmei kin agi tansü kati

– S. T. Yapang. Lkr. Kohima.

Tang Rongmei kin lutsüa ashir masü, saka asen Nagaland state temoatsü aser asen temeten aginür rongnung sentsü maketer kinji parnok lir. Sentsü maketer kin ka asoshi asen Aor o Aor na tsüngda olangteper süra asüng sentsü aketer koda ka ang tonga moutettsüsa alirtem arua dennüa jembika asünunga koda asütsü (?) ta bilemer. Idangjibo ola adoker malitsü, aitsütsü melen nenok arutsü yongyaseta liasüa ya ta narozük bener atatsüsa dang akümtsü, mesüra ano noknü tashia amshitsü akok.
Tang Naga Hoho ta sür telok ka nung asen Aor tir lir, aji junger, saka nüchi nübur ajaki meteta lir, Aor-bo Naga Hoho ta sür koba mulungtet telok ka lir yang nung jagi atsüngogo, anungji kari teteyuba agütsü nungang mesüra shiti ka ajanga dang iba telok nungi anentsü atara tangar kongi aoar memetet alir rogo dang asütsü. P. Chuba Ozüküm-i Naga Hoho nung madentsüsa pa nija aibelena malitsü akok, saka Aor-bo atsüngogo, joko Aor shilem Naga Hoho nung mali. Ashiko ano Naga Hoho-i iba shiti meyipa magii tang amaisa nokdakra CNTC, NTC senteper Naga Hoho ta asüba telokji Nagaland state nung inki shitsütsüsa (suspended) tensa ka arutsü imlaseta atar.
Iba Rongmei kin keno dak sentakba nung koba CNTC-i Naga Hoho dang parnoki tamalen Nagaland Government dangi züluba shiti meyipa agiang ta atemzüktsü. Ibaji osang kaket ajanga dang angashi ta P. Chuba Ozüküm-i Tir Yimyim October 12/2016 Olemsabang nung shia lir, saka CNTC-i October 15, 2016 TYY mezüng tapak nung CNTC executive ka ajanga Naga Hoho president nem tezüluba nung agütsü ta shia lir, ya nisung kati asen Aor dang masü kin ana asem mezüngmeshiba aser yimsüsüri jaktaka tiyazü jembiba asünungji senchi talang tashi mechiaka tarutsü nung ano lokti tuluba nung pongsema aotsü, idangjia tang amajisa jembira koda asütsü, anungji tekümdangtsü aser tansütsü asoshi Ao Senden-i tenarongbo mesük langer ta nibo bilemer. Mesüra CNTC-i ang tiyazü jembir ka süra asenok tiyazü jembir telok nung adentsü nüngdak mali.
Tongtibangtibaji ya, tang amala kechiar memetet makmakshimakba nungi benteta jenjang tajung ka alangtettsü asoshi alijak nung aliba Aor Süngpu nungi Pujen tashi senteptsüsa Inti Mungdang ka ayong nung iba tsüngken kija jagia tang ajurua aliba timtem ya jena aotsü, aser tasü peleter alir rogo ajak ya saaktetla aser tang makmakshimak ajak ya teti asoshi tembangla, anungji tekaraba nung iba Inti Mungdangji alitsü nibo ajungshir.
Tang yaki tansü kar tarutsü nungbo Nagaland state dak sentakba keno Nagaland Tribes Council, CNTC, ENPO amala Nagaland State kübok tenteta aliba telok dang masüngdangibo kecha inyaka maotsü Nagaland Government nema tetuyuba agütsütsüla, kechiyong asen kilung mapa asünungji aseni dang inyaktsü.