Rongmei Kin ken-o nung angajemtsü onük kar

~ P. Chuba Ozukum, President, Naga Hoho.

Nagaland sorkar-i Rongmei kin nem Indigenous Tribe status agütsüba onük dak ajemdaker lokti sabang palala aser osang kaket palala nung tebilemba aika lemsatepba angashia arudagi. Iba kusa onük nung ni metetba, angashiba aser ajangshia arubatem asen Aoertem den lemsateptsü iba zülu ajanga merangdanger. Ni Tang Naga Hoho President teinyakdak suaka, tanubo Ao senso ka ama dang lemsateper.
21.10.1981 anogo nung Rani Gaidinlu-i Nagaland Chief Minister dangi Rongmei nunger nem Naga Tribe jenjang agujang ta Memorandum ka zülu. Iba zülu ya reprangdanger, sorkar-i cabinet memo ka 02.12.1982 anogo nung renema cabinet nem agutsü, saka telemtetba kecha makai dang aru. Ano 2003 küm, Wb. Dr Hokishe Sema, DAN (Democratic Alliance of Nagaland) Chairman asuba mapang, pai iba mapang aliba Nagaland Chief Minister, Wb. Neiphi-u Rio dangi shiti ka 13.04.2003 anogo nung zülu. Iba shiti nung pai Rongmei nunger nem Indigenous Naga Tribe jenjang agutsütsü tetemsu anungji parnok nem temeten agujang ta mepishi.
Nagaland cabinet meeting 03.08.2007 anogo nung amendang Rongmei nunger temepishiba reprangdangtsü nungdak ta lemtet aser Committee ka Home Commissioner Chairman sur, Additional Secretary, Law aser Additional Secretary (P&AR), tena member sua sorkar tezüluba ka ajanga 28.09.2007 anogo nung shimtsü.
25.07.2008 anogo nung Additional Chief Secretary, Home ajanga shiti ka Naga Hoho dangi zülu. Iba shiti nung tongtibang onük kar yamai zülua lir: a) Rongmei Council, Nagaland nungi par kin nem Indigenous Naga Tribe agujang ta temepishiba ka Nagaland sorkar dangi arua lir aser ibaji reprangdangtsü asoshi Committee ka shimja lir; b) sorkar-i sa Rongmei kin nubortem shirnok 1963 küm Nagaland State akümba jakdang arua lir aser koba ajanga parnok Nagaland state nung Indigenous Inhabitant ta züngshitsü temsua lir, parnok tenung yongsuk (Special Enumeration) agitsü asoshi melaogo. Iba temelaba ya sorkar sangdong No. AR-8/8/76 dated 28th April 1977 dak ajemdaker inyaker; c) committee jagi Naga Hoho dang asungdangnubaji Rongmei kin nutsüngtem shirnok December 1963 küm Nagaland state anguba jakdang arua Nagaland nung lidar aser temalen aguja aliba sorkar sangdong dak ajemdaker (No. AR-8/8/76 dated 28th April 1977) Nagaland nung Indigenous Inhabitant ta züngshitsü temsua lir, parnokji Indigenous Naga Tribe ta züngshitsü asu Nagaland nung Non-Naga Indigenous Tribes ta züngshitsü?
Iba shiti indang jembitsü asoshi Naga Hoho Presidential Council 05.09.2008 anogo nung ayongtep aser telemtetba agi. Iba meeting nung Naga Hoho nung tanga affiliated kintem dak alaka Sumi Hoho President, Kyong (Lotha) Hoho President aser Ao Senden General Secretary-a tensema liasu. Iba telemtetbaji, Additional Chief Secretary, Home dangi 22.09.2008 anogo nung shiti ajanga metetdaktsü. Iba Naga Hoho telemtetba metetdaktsüba shiti nung züluba tongtibang onüktem yamai lir: a) Rongmei nunger 1963 küm Nagaland state anguba jakdang arua alirtem nem Indigenous Naga Tribe jenjang agutsütsü magutsütsü, iba indang Naga Hoho Presidential Council meeting 05.09.2008 anogo amenba nung jungjunga rasaa jembiogo aser yangji lemtetba Naga Hoho tebilembaji Nagaland sorkar-i jangraba ama Rongmei kin züngshitsüla (recognize) b) Sorkar sangdong No. AR-8/8/76 dated 28th April 1977 dak ajemdaker koba Indigenous Inhabitant jenjang Kuki, Garo aser Kachari kintem-i maongka agidar iba kusa jenjangji Rongmei nunger nem-a agutsü junger ta Naga Hoho tangatetba ashir c) aji suaka, tenung yongsuk (enumeration) agidang tarutsü nung Naga kintem tsüngda mangatettep madoktsüsa, langa (qualify) aliba Rongmei kin nuburtem shirnok Nagaland state akümba jakdang arua lia liasu parnok dang shimtsü asoshi Committee-i kanga nendaka aser kümdanga inyaktsü Naga Hoho tebilemba metetdaktsür.
Temalen aguja aliba Naga Hoho-i Nagaland sorkar dangi züluba shiti nung ashiba onüktem ajanga Naga Hoho tangatetba aser taginuba kanga junga jangjatsür. Ya angatettsü asoshi sorkar sangdong No. AR-8/8/76 dated 28th April 1977 nung shia aliba tongtibang onüktem ken angatettsü nungdaker. Itemji: a) mapa-i aitsü (employment) nükjidong nung, Nagaland State nung Indigenous Inhabitant ta ajatsü temsutsü asoshi nisung ka 01.12.1963 küm jakdang nungi teti atema Nagaland nung alir asutsüla (permanent settlement); b) aser 01.12.1963 jakdang teti asoshi lia liasu ta kuli asutsü asoshi item jenjang ya katettsüla: i) pa mesura par tsürabur mesura par guardian tenung 05.12.1963 anogo nung adokba Electoral Roll nung alitsüla, mesura ii) pa mesura par tsürabur mesura par guardian-i 01.12.1963 jakdang nungi House Tax aguja alitsüla, mesura iii) pa mesura par tsürabur mesura par guardian-i ali aser patta 01.12.1963 jakdang alia alitsüla.
Iba sorkar sangdong ya Naga nunger Tribe masurtem nem Nagaland nung Indigenous Inhabitant jenjang agutsütsü asoshi lemtetba maparen atema dang lir aser kodang-a tanga kin nem Naga Tribe agutsütsü indang masu. Aser Naga Hoho-i kanga jangja-a angateter Nagaland sorkar dangi züluba shiti nung memangmangtsü asoshi (to avoid ambiguity) iba sangdong dak ajemdak (refer) aser Kuki, Garo, Kachari kintem tatishitsü sa amshi.
Iba tsüngda State government-i shimtsüba committee ya 12 ben meeting mener, state government nem recommendation renema agutsü. Iba recommendation nung aika zülua lir, saka tongtibang onük ji, Rongmei nunger nem Nagaland nung Indigenous Rongmei Naga Inhabitants jenjang agutsütsüla ta sorkar dangi onük aben. Iba kusa zülu nungji jangja jangja-a Rongmei nungerji Nagaland state nung Indigenous Naga Tribe ka mekümtettsü ta shia lir. Iba recommendation dak ajemdaker, 22.06.2012 anogo nung Home Department ajanga renemba Cabinet Memorandum nung Committee recommendation nung aliba kusa onükji benoka cabinet lemtet akatsü asoshi agutsü. Cabinet memo den kulemi Annexure – A ta sur Committee recommendation rangben cabinet member tem nem agutsü. Cabinet meeting 23.07.2012 anogo nung amen aser iba senden nung Rongmei nunger nem Indigenous Naga Tribe jenjang agutsütsü lemtet. Iba lemtet agiba cabinet meeting nung Chief Minister-i anir parnok Minister 8 liasu, tenung agi – Wb. Neiphi-u Rio, Wb. Dr. Shurhozelie, Wb. T.R. Zeliang, Wb. Imkong Imchen, Wb. Nyeiwang Konyak, Wb. Kuzholuzo, Wb. Dr Ngangshi, Wb. Dr Chumben Murry. Iba telemtetba ya Nagaland sorkar sangdong ka ajanga 04.08.2016 anogo nung sangoktsü.
Temalen kechisa tatalokbatem lemsaogo, item ya ni ajangshia arubatem aser aji ochi-a ta ni khuli asur. Kar-i jangjashinura, mashi mapang nung ku den tongteprateptsü mepishir. Nibo yamala satok satoka pei nubor den pei tangatetba lemsateptsü maongka tanu tashi mangu asünung, mapang aser jaka agiaka marendaki zülur.
Osang kaket sangdong ka ajanga CNTC-i Naga Hoho dang 30.08.2016 anogo tashi nung parnoki 05.09.2008 nung Nagaland government dangi züluba shidiji meyipa agiang ta atemzüktsü. Osang kaket ajanga dang angashiaka, Naga Hoho Presidential Council 19.08.2016 anogo nung iba onük asoshi mena sensaksem aka. Naga Hoho inyakyim nung Federal Assembly alitsü asoshi anogo 30 advance nung sangdongtsü nungdaker, anungji CNTC-i atemzüktsüba anogo memeneptet saka 28.09.2016 nung Federal Assembly amentsü lemtet. Presidential Council telemtetbaji 03.09.2016 anogo nung osang kaket ajanga Rongmei kin dak sentakba onüktem nung Hoho tangatetba aser inyaka arubatem jangja-a metedaktsüba den kulemi kin asem dang Naga Hoho nungi atsüngentsü lemtetbaji reprangshitsü mepishi. Maneni 28.09.2016 anogo Naga Hoho Federal Assembly mena tali tejangjaba nung Hoho tangatetba nenshi aser iba lemtetji 29.09.2016 nung osang kaket ajanga metetdaktsü.
CNTC 24.08.2016 anogo nung meeting ka lia kin asem – Ao, Sumi aser Lotha parnok Naga Hoho nungi atsüngtsü lemtetogo ta angashi. Ya angashia ni Ao Senden ketdangsertem den ajuruteptsü ilunga apuso kechiyong Ao Senden akhüm nung dang ni tanü Naga Hoho nung shilem agidar. Ni asüngdangba ama Ao Senden Presidential Council-i 31.08.2016 anogo Mokokchung nung ni parnok den ajuruteptsü maongka agutsü. Ni parnok dang ashi Ao Senden Naga Hoho nungi atsüngentsü taoba CNTC meeting nung lemtet süra, Ao kin madenba lokti ka nung ni President süa alitsübaji tim masu, anungji nenoki iba telemtetba yimjak-i benur maodang ni anenbaji dang temeten asütsü, anungji ni tama Naga Hoho President nungi anendi. Saka parnoki langzü, CNTC meeting nung na anentsü atema jembia mali aser na Naga Hoho nungi anentsü menüngdaker. Iba meeting nungjisa Naga Hoho-i 28.09.2016 anogo nung ayongba Federal Assembly nung Ao Senden arua dena iba ken-o lemtepa jembitsü bangjemteper senshi. Anungji ni bo tanü tashi iba o amer kasa jenjang nungji dang ata-a ku yimten khuret bena arudagi.
Naga nunger kin ajunga-i meraketa reprangba aser tarutsü teimla ayuba kin asen Ao kin-i iba tongtibang onük nung shilem agia tebilemba balala lemsatepdagi aser nübur yimli (democracy) ka nung yamala sabang balala nung sensaksemba aser o intep akaba ya lokti tejakleni aoba kuli tajung ka ta reprangteta kanga pelar. Rongmei kin nem Indigenous Naga Tribe jenjang agütsüba ya Naga nunger timba-i memolunger ta angateta Naga Hoho-i tetenzük nungi jenjang ka agiogo. Aji dang masü, iba ken-o atema Supreme Court nung aser sorkar tendak tejembidak lir. Anungji iba mapa ya Naga nunger-i aginuba ama atalokdaktsütsü asoshi Naga kin ajak tali longjemshia obang ka sür tim sabang nung jembitepdi arung ta ayongzüker. Kati ka dak temolung lemtep shisatsü bener, nükjidong ka dang sür asen Aor tsüngda telemsa madokdaktsütsü saka tali dang longjemer, asen Aor asoshi dang masü saka Naga nunger ajunga temaba jenjangi anitettsü temolungtet tulu kar lokti len tuyur sudi ta ni ayongzüker.
Tsüngremi asen Aor maneni moajangma.