Rongmei kin onük Nagalima nung benjatsüsa ya shir sentong ?

–  S. T. Yapang. Lkr., Kohima.

Tanga kini asen Ao kin dak nungi Naga nunger Nagaland state ta jateta aliba telongzük nung nüchi tia ka penzüa aliba mapang, Aor rongnungi temulunger jenti adoka pei senmang nung tangar kibur südaktsünür aliba ngua, tangarbo ya tashi tagütsünü no ta kanga pelar aser tenüngsang agütsür.
Külen Ao, Sema, Lotha yimsüsürtemi pei kin telongjem dang Naga Hoho koba teloki Nagaland State temeten kasa Naga nunger süaka Nagaland state nung maden parnok nem asen temeten ya agütsüdi ta ashir, iba telok den longjema alitsü tim ta mepishitsüsa tashi asen kin asem anüalema ali no! Kin telongjemi tetuyuba agütsü tsübuseta ata ali melen ano parnoki ang asen temeten tangar nem agütsüdi asüba telok den adentsü ajungshitsüsa litetba ya koda? Ya shir sentong nung jangjonger ?
Takokeribo aser alushi talubusa aliribo Naga Hoho nungji adentsüla ta ashitsüji tim, aser Ao Senden-ia aji mesongtemtsüla, nisung kati pei akaba senmang aser rongsen tangar nem lemtsünüra aji tamangba yimsü nung aketba mapa ka asünungji tenüngsang dang agütsütsüla, Ao lima nung shir tzükong aser yimerisa ner temeten tangar nem agütsünüa ali mulungsoa agütsütsü nibo ajungshir.
Ao, Sema, Lotha kin asem senteper Naga Hoho dang Rongmei kin nem asen temeten agütsütsü junger ta asübaji meyipa agiang ta shiaka tenaronglaka mayipzür aser yamaji asütsüsa nisung kar sentong nung asenok anüalema sayu.
Tang Rongmei kin keno ya khen anena lir Naga Hoho nung dennür koba tetezü Rongmei kin anioka asen temeten par nem agütsütsüla ta ashir parnok o Naga Hoho nung madentsü tetezü tangar nem asen temeten magütsütsü ta ashir, iba telok ana tsüngda keno ka tama bentetmatsüla aji tongtibangtiba lir, kechiyong Rongmei kin anioker ano tesülen kechi asütsü aji Nagalima anishirtemi tamalen yongi renema lir. Tangar küm aika renema akaba tang Ao, Sema, Lotha kin asem, yangjia julangjushia memedemi nokdakba agi iba sentongji raksatsütsü asaktsü, anungji Aor, Sema, Lotha nunger dang masü tanüngba Nagaland state kübok aliba kintem nungi Naga Hoho nung dennür o medennürtem tsüngda tenüng züludener sorkar mapa aser inyakyim ajak tama lemsatsüla, iba sülen shir kinsa anioknür/dendaktsünür par mulung südakjang, tang Nagaland state nung aliba nütsüng dangbo timba adoka adentsü tamasayongi renemer Rongmei kin ya mezüng tetendangba ka asoshi anioktsü meranger dang asütsü, tang yabo tetendangerba dang asütsü akok.
Ashiko tesülen Nagaland State nung medenaka kasa Naga nungersa asen adianu Rongmei kin den kasa mesüra parnok dang temeten talila akaba kin Mao aser Tangkhul amala züngoktsü asoshi tang ya tetendangba ka alir dang asütsü, ya kasa asen Naga nungersa süaka tangar külak nung alima balala lemsar alir dang asünungji ner akaba akok tashi lemsateptsü junger.
Tzükong kar maden yong mesüra yim kari pei akaba lemsatepnüyong kechiba asenok temulung ajema alitsü? Leniri pei nübur aser kin asoshi taküm tenlatsü metsübutsüla, süra tang amala kechiar memetet anüalema aliba ya shir lenir mapa aser shir leniba kübok yamai Aor anüalemdaktsür? Tesüsa asen Aor yara majishi sotzüa meyongshi ta asü ama Sema aser Lotha dena tesentaktep raksa, Naga nunger dena medentet ta asütsü. Asenoki Naga Hoho-a süang mesüra Naga nunger telongjem ka nung denaka ajaki metet Anüdoklen alir telongjem balaka tenteta lir, Anülutip alir par Tenyidi kin tashi ita para par balaka odaki, ajungbenaka Nagalima yimdenren nung temelenshi ka adoktsü shingaia meteta mali, iba amala mapang asen Aor kechiang mashiba tensa ka ajurutsü arendaka bilemer. Item ajak ya tanü ajung asar yimsüsür aser süngojemtsü agi mesüzükdaktsür mesüra amokmeren tsübur lenir aliba mapang alimaji raksaa tepetzük tiai aitsü.
Tang Rongmei kin keno yagi Naga yimjung nung kongshitsüsa kecha sentaka mali, ajaki metet NSCN IM o India sorkar na keno jembir, yangji Rongmei kin mesüra Naga Hoho ken o den tsükteptsüsa kecha mali.
Hoi… Aolisangertem, ajak repranga atar dang masü ako noo, leniri ashiba ata alir, saka mapang tetemsü nung leniri kecha meshitet anüalema lira nütsüng nübur temulunger sendener teloki ang lenir nem tetuyuba agütsütsüsa akümtsü.