Rongmei nunger dak nungi ‘indigenous tribe’ jenjang meyipa agiang : CNTC

Dimapur, July 29 (TYO) : Rongmei nunger nem indigenous tribe jenjang agüja aliba meyipa agiang ta Central Nagaland Tribes Council (CNTC)-i takhangba agütsü.
July 22, 2016 nü Khehokhu yimtsüng nung Ao, Lotha aser Sumi nunger tongti teloktem külem senden ka nung iba telemtetba agi.
Nagaland state nung Rongmei nunger nem ‘indigenous tribe’ jenjang agütsüba indang onük benoka olemtepba sülen November 22, 2008 nü Naga Hoho-i iba onük pusema nungita züluba shidi meyipa agitsüla ta CNTC-i bangzünga renem.
Iba sangdong agütsüba sülen nungi anogo 30 nü tsüngda Rongmei nunger nem ‘indigenous tribe’ jenjang agüja aliba meyipa agitsüla aser ibaji meinyakra CNTC-i junger ta bilemba mapa inyaktsü, ta CNTC-i sangdong ka nung metetdaktsü.
Nagaland ama state tila ka nung talir ajak nem indigenous tribe jenjang agütsüra, asüng telok mashii kati kasa jenjang meshitsü, aser ibaji ajanga Nagaland nung lisopurtem timtem tulu ajurutsü. Anungji iba shisa maka inyakyim ya meinyaktsüla, ta CNTC-isa metetdaktsü.
Nagaland telongtet nung Rongmei nunger indang litsü balaka mali aser parnok nem ‘tribe status’ agütsüba medentsüsa kuli kecha mali. Nagaland nung 1963 jakdang arua alirtemi nüngdakba criteria tongra ‘indigenous inhabitant’ jenjangbo agütsütsü akok, ta CNTC-isa ashi.
Nagaland nung ‘indigenous tribe’ jenjang meshir ajak nem agütsüra, tarutsü putu tia raksatsür asütsü aser iba inyakyim ajanga asüng telok mashii kati kasa jenjang meshitsü aser agütsütsüsa akümtsü aser ibaji ajanga Nagaland tarutsü nung timtem tulu bener arutsütsü, ta CNTC-isa metetdaktsü.