Rongmei onük atema Cabinet Sub-Committee tentet

Dimapur, September 26 (TYO) : Kin Hoho balalai Rongmei onük atema sangdong balala agütsüba onük jembitsü atema September 26, 2016nü Cabinet senden ka amen, ta Cabinet Secretary, Pankaj Kumar-i sangdong ka nung metetdaktsü.

Nagaland nung Naga kin ka ta Rongmei kin züngokba ya July 23, 2012 nü Cabinet-i lemtet aser iba sülen Home Department-i August 8, 2012nü sangdong ka ajanga iba telemtetba osang metetdakja liasü ta tanü Cabinet senden nung olemtep.

Iba onük ya Gauhati High Court nunga Zeliang People’s Organization aser State of Nagaland & Ors tsüngda tangatettep kati marui lir aser ano April 3, 2014 nü Cabinet-i iba onük reprangshimtsü atema Chief Secretary menden ser shimtetba Committee-i ano bushitetba osang magütsüi lir ta Cabinet-isa tanü senden nung angajem, ta Cabinet Secretary sangdong nung shia lir.

Iba onük ya kanga tongtipang ta angateta tanü Cabinet senden nung züngsem 8 agi akümba Cabinet Sub-Committee ka tentettsü telemtetba agi aser parnoki iba onük atema kanga junga shisadanga reprangshimtsü aser tekaratiba nung sorkar nem osang agütsütsü, ta sangdong nungsa shia lir.

Cabinet Sub-Committee züngsemtem:

1.   Dr. Niekiesalie Nicky Kire, Minister (Environment, Forest & CC)          – Convenor
2.           Shri P. Longon, Minister (Health & Family Welfare) – Co-convenor
3. Shri Y. Patton, Minister (Home) –  Member
4. Shri Tokheho Yepthomi, Minister (PHED) –  Member
5.           Shri Kipili Sangtam, Minister (Power) –  Member
6.   Shri Nukutoshi, Minister (Mechanical, National Highways)                 –  Member
7. Shri C.L. John, Minister (Rural Development)-  Member
8.   Shri Yitachu, Minister (School Education) –  Member
9. Shri Y. Vikheho Swu, Minister (Roads & Bridges)-  Member