Rongseninla Aier-i Agri marketing shed semzüktsü

Dimapur, November 26 (TYO) : Tuesday bazar, Lengrijan village nung aluyimertem nüngtem nung Department of Agriculture-i sütsüba, agri marketing shed ka Department Director, Rongseninla Aier-i Honibarnü semzüktsüogo.
Rongseninla-i, iba marketing shed ya sensakertem aonsotsü yoka rongsenkettsüng ajungketba nung yaritsü nükjidong nung sütsüba lir aser tang nungi anü tatsük nungi kümzüka aonsotsü yoka mentettsü, ta shed semzüktsü dang ashi.
Iba marketing shed asütsü atema sen tera tang agütsü saka mapang tatsüka tsüngda nung renema semzükba atema Lengrijan Village Council dang pelar, ta lai metetdaktsü.
Shed asütsü atema sen agütsüba asoshi Lengrijan Village Council Chairman N Meren Imchen-i department nung Director aser ketdangsertem dang pelaba metetdaktsü aser iba ya ajanga Lengrijan aser temeket kiyongtem ajangzüktsü imlar ta ashi.
Iba ki meshiteta DABA nung Pastor Rev. Maong Lemtur-i sarasadem aser Lengrjan Village Council nung Gaon Bora Meren Jamir-i anküp tepela o jembi.
Ano November 25, 2016 nüa Mokokchung district kübok Longpa yimtak Rongsenienla Aier-isa aluyimertem taküm atema pokyimtsü asoshi Agri Link Road-“Ngatem” lapoktsüogo.
Lenmang lapoktsüba sentong nung jembidang Tongti tesemdanger Rongsenienlai, chiyungtsübo tang tali tenüngdakba akümer sürnung tanü asüng nisung aikati aluyimba nung temulung magütsür, ta sasa bilemba olen ka lemsatep.
Lai, mongpu aser mongpu masüba mapangtem nung tsünütsü yokba tsütsü metetpelatsü atema DAO, Mokokchung aser SARS Yisemyong ketdangsertem den ajurutepa asüngdangtep nung ajungtsü, ta ashi.
Lenmang lapokba sentong nung Longpa Baptist Arogo Sannüker Lepden N Imchen-i lenmang meshiteta sarasadem, DAO, Mokokchung Nungsangkaba-i o tatsüka jembi aser anküp tepela o Longpa Village Council nung Tatar K Akum Aier-i jembi.