Rongsenkettsüng ainba anenogo: Yechury

New Delhi, Luroi/August 02 (Agencies): BJP-i aniba Centre sorkar aija Hokolbarnü CPI(M) General Secretary, Sitaram Yechury-i, temaitsü balala ajanga linük rongsenkettsüng ainba anenba kuli sayur, ta metetdaktsü.
Yechury-isa, loktiliba, yimtenren aser yimsüsüba den rongsenkettsüng piladaktsütsü makok; ruling party-i loktiliba nung mepetmesü aser tesempa ajungkettsür, ta aitsü.
Osangkakettem nung linük rongsenkettsüng ainba anenba osang nung ajemdaker Yechury-i, sorkari yazü jembibaji miimbangtsü atema shingaia meyaritettsü, ta ashi.
Pai twitter ajanga, “Temaitsü ajungai linük rongsenkettsüng ainba anenba kuli sayur, aser ibaji sorkar mapatongtem ajanga lir. Kecha agi nüburtem timtemdaktsübaji nembangtsü makok,” ta metetdaktsü.
“Rongsenkettsüng timtemba osangji ajaklen angur. Ajisüaka loktiliba, yimtenren aser yimsüsübaren den rongsenkettsüng piladaktsütsü makok. Iba sorkari junga yimsü masüba, ruling party indang yimtenren tangatetba ajanga loktiliba nung mepetmesü aser tesempa ajungkettsür. Itemji ajanga rongsenkettsüng maintsü,” ta pai ashi.
Brihostibarnüa pai sorkar aija, “Sorkar rongsenkettsüng mapatongtem ajanga aluyimertem, tilateri shishilembartem aser entrepreneurs jenjang raksatsür,” ta aija liasü.