Rongsenkettsüng jenjang ajungkettsü atema tangatetba melenshitsüla: CM

Dimapur, December 19 (TYO): Asen rongsenkettsüng tajungba kümdaktsütsü atema asenok tangatetba melenshitsüla ta Nagaland chief minister T.R. Zeliang-i ashi.
New Jalukie Village, Peren indang Hon Jubilee benjung nung tongti tesemdanger o jembidang pai iba tayongzükba agütsü.
Asen rongsenkettsüng tajungba kümra, asenok taküm libaliro dena melenshitsü. Asenok tangatetbaji tangari masü saka asen sasa dang melenshitettsü, ta TR Zeliang-i shisem.
Chief Minister-isa, Rajasthan nung White Revolution aser Korea nunger Meat Production indang atishia jembi. Item maparen ajanga parnok taküm nung temelenshi jenti liasü ta paisa shisem.
Küm 50 ji mapang talangka lir aser imlar iba yimtsüng ajaklen shisakaa kümogo. Yimdaklirtemi alizüng ka yur sorkar teyari agia rongsenkettsüng tsütsü terenlok alitsü atema mapa inyaktsüla, ta TR Zeliang-isa metetdaktsü.
Asen lanurtem dak akteba sempettem amshitsüla aser asenoki kisüba mesüra tanga mapatem asoshi state adena orr alirtem masü saka asen Naga nunger lanurtem nübo amshitsüla. Iba tangatetba nung sorkari ‘Year of Construction Workers’ ta jateta state ajungalen lanurtem sayutettsü atema mapa inyaker, ta paisa ashi.
Iba sentong nung Highways Minister, G. Kaito Aye-i New Jalukie nung alirtem nem küm 50 ajungba tepela salem metetdaktsü.