Rongsenkettsüng mainba atema UPA nem tai metongloktsütsüla: Yashwant

New Delhi, September 28 (Agencies): Yashi BJP lenir tain, Yashwant Sinha-i linük rongsenkettsüng jenjang mainba atema Centre aser Union Finance Minister, Arun Jaitley nem tai tongloktsüba sülen maneni Brihostibarnüa pai, linük rongsenkettsüng mainba atema Congress Party-i aniba taoba UPA sorkar nem tai metongloktsütsüla, ta ashi.
Yashi pai osangkaket ka nung züluba ocet nung ajemdaker pa dang tasüngdangba kar asüngdangba langzüdang BJP lenir, Sinha-i, “Rongsenkettsüng ajema kümdar. Onoki taoba sorkar nem tai metongloktsütsüla, onoka mapang aser maongka peria liasü,” ta ashi.
Yashwant Sinha-isa, joko mapang tatsüka linük rongsenkettsüng jenjang ajema kümdar, saka ni iba indangji mejembii liasü, ta ashi.
“Ni iba ya quarter (ita asem) nung ajemdaker jembir masü, saka quarter trok atonga rongsenkettsüng jenjang ajemdar,” ta pai ashi.
Iba ya talisa demonetization ajanga lir, ta shia Sinha-i, demonetization ya rongsenkettsüng atema teraksatsüba ka liasü, ta ashi.
“Rongsenkettsüng ainba mezülongi akümbaji sen notes anentsüba ajanga lir. Iba ya ajanga rongsenkettsüng nung koma kongshitsü? ta tama junga bushisüngdangtsüla asü, ronsenkettsüng jenjang junga aliba mapang nung iba ya benoktsüla asü,” ta pai ashi.
Tanü Sinha-i, demonetization inyakyim junga mebenok, ta ashi.
“Demonetisation ajanga takoksa anguba sülen, ano Goods & Service Tax (GST) benok. Aritepa inyaktsü nüngdak maliasü. Parnoki October ita (2017 küm) tashi ata nung tajungba süla,” ta paisa ashi.