Rongsenkettsüng mokdangba ajanga election maparen nung mekongshitsü: EC

Imphal, February 16 (Agencies): Tang Manipur nung rongsenkettsüng lenmang mokdangba ajanga state election dak sendakba maparen nung timtem majurutsü, ta Manipur Chief Electoral Officer, Vivek Kumar Dewangan-i tanü metetdaktsü.
“State nung election asoshi central police force company 250 arutsü. Election ketdangsertem nem tesayuba agütsüogo. Anungji election kecha timtem melii agitettsü. Rongsenkettsüng lenmang mokdanger telokia election nokdangtsü asoshi kecha shia mali,” ta Dewangan-i osangbener dang ashi.
Manipur assembly nung menden 60 asoshi March 4 aser 8 nü election agitsü aser March 11 nung vote azüngtsü.
EC teloki video conference ajanga state chief electoral officer, police tongtir, chief secretary, home indang additional chief secretary aser Indian Oil Corporation ketdangsertem den Manipur tensa indang Mongolbarnü jembiogo.
Manipur nung district tasen tenet tentetba aser Sadar Hills ya ‘full-fledged’ district kümdaktsütsü asoshi sorkari lemtetba anema United Naga Council (UNC)-i 2016 küm November 1 nungi tenzüka rongsenkettsüng lenmang mokdangba tang tashi agia arudar.
Sorkar yimsüsüba nung tajungba akümtsü asoshi iba telemtetba ya agi, ta Manipur sorkari ashir.
UNC-i NH 2 (via Dimapur) aser NH 37 (via Jiribam) lenmangtem nung rongsenkettsüng mokdangba ajanga Manipur nung chiyungtsü, oset balala aser totzü agi kanga anünga kümogo aser jenjang kanga saaka kümogo.