Rongsenkettsüng terenlok atema yimjung alitsüla: Sushma

New Delhi/New York, Rongjui/September 29 (Agencies): New York nung UN General Assembly alidang South Asia nung foreign minister tem jurila senden ka nung India Foreign minister, Sushma Swaraj-i kiralongra nung ajemdaker Pakistan sendoktsü ajungshi.
Pakistan-ia, South Asia nung India-i terenlok aser azükaru nokdanger, ta aitsü.
UN Assemby senden alidang India External Affairs Minister, Swaraj aser Pakistan Foreign Minister, Shah Mehmood Qureshi na ajurutepa jurila senden ka amentsü sentong liasü, ajisüaka arrtsülen Pakistan nungeri Indian army tepsetba nung ajemdaker iba senden thinen.
South Asian Association for Regional Cooperation (Saarc) linüktem nungi Foreign Minister tem senden nung jembidang Swaraj-i, “South Asia nung rongsenkettsüng terenlok aser amalitep alitsü atema yimjung nüngdak,” ta metetdaktsü.
Laisa, asenoki lemtetbatem ya mapa küma inyak nungang Saarc ama sendentem ya ayonga akatsüla, ta ashi.
2016 küm Saarc Summit ya Pakistan nung ayonga liasü, ajisüaka India-i, Pakistan-i India nunger anemba kiralongrar teloktem pusemer, ta shia iba senden nung maden.
Swaraj-isa, “Neighbourhood First” mapatong nungi tenzüka kidanger linük (Pakistan) den apu alatsü atema India-i inyakogo, ta ashi.
“Region nung aliba linüktem amalitepa inyaktsü atema India-i melunga lir. Asen region nung terenlok aser azükaru alitsüji onok atema tongtibangtiba onük ka lir,” ta lai ashi.
India-i rongsenkettsüng, scientific aser technology nung terenlok süngjangtemji South Asia linüktem den lemsateptsü melunga lir, ta shia lai South Asia Satellite, South Asian University aser Saarc Disaster Management Centre mapatongem metetdaktsü.
Laisa, region nung yimjung alitsü atema amalitepa inyaktsü nüngdaker, ibaji ajanga rongsenketsüng jenjang renloktsü aser azükaru alitsü, ta ashi.
India aser Afghanistan nati, Pakistan ya kiralongrar teloktem sademsadema jenoka aliba linük ka lir ta aija arur, aser iba dak sendakba nung lai, “South Asia nung tatalokbatem aser amokmeren balala kanga bulua kümdar. Asen region, aser alima nung yimjung amokmeren tulutibaji kiralongra lir. Asenoki kiralongra tapu ajak samatsütsü nüngdak,” ta ashi.
Swaraj-i onük jembiba sülen Pakistan foreign minister, Shah Mehmood Qureshi-i onük jembitsü lia lai senden toktsür ao.