Rooney aser Charlton na goal kasa kümogo

Manchester, January 07 (Agencies) : Wayne Rooney-i Bobby Charlton-i yoka aliba goal menepa Manchester United purtem rongnungi goal agutsüba nung otsü tasen ka yangluogo. Pai par telok asoshi goal 249 buba aguja iba otsü tasen Honibarnü Reading den Old Trafford nung FA Cup asayadang yanglu.
Küm 31 tain Rooney-i minute 7buba nung, Juan Mata-i yanglutsüba ball, Reading goalkeeper Ali Al Habsi atena pa temokok agi idaktsü.
Arishi küm 79 tain United nung asaya alisang Charlton, aser united manager alisang Sir Alex Ferguson na dena, pa sapurtem den külemi pai iba jenjang tongtetba asoshi pelateba liasü.
Taoba United Captain Bryan Robson, Rooney nem tenüngsang agütsür rongnung mezüng pur rongnung liasü. Pai pa indang Twitter nung yamai zülutsü: “Sir Bobby indang record tongtetba asoshi Rooney nem tenüngsang agütsür.”
Rooney-i 2015 küm England pur asoshi 543 buba asaya asayadang Charlton-i England asoshi goal 49 agütsür aliba record tongtet. Tang tashi nung pai par linük asoshi goal 53 agüja lir.
United pur rongnungi timtiba asayasang Charlton liasü, saka May 2008 küm Ryan Giggs-i iba jenjang tongtet.
England nungi Euro nung 2004 küm, aser Champions League Fenerbahce den pa asoshi mezüng asaya nung goal 3 agütsüba sülen, Rooney küm 18 asüdang 2004 küm Everton nungi United-i aru.
Tang tashi nung pai Premier League 5, League Cup 2, yaküm FA cup, 2007-08 Champions League aser 2008 Club World Cup par telok den koka lir.
2010 küm asoshi pa Professional Footballers’ Association, Football Writers’ Association asayar sempet angu.
Louis van Gaal-i July 2014 küm Rooney United captain asütsü shim, aser ita ka lir manager Roy Hodgson-i England captain asütsü pa nem agütsü, saka Jose Mourinho United-i arur külen nungi pa mezüng 11 rongnung aiben mezüngsemer. Cup tetoktepba nung dang khen khen mezüng asayar rongnung züngsema asayardar.