Roopa Ganguly Rajya Sabha nung shimokogo

New Delhi, October 4 (Agencies) : TV sentong Mahabharat otsü nung Draupadi ama shilem agila, actor aser BJP lenir Roopa Ganguly Mongulbarnü Rajya Sabha nung shimokogo.
Ganguly-i taküm West Bengal Assembly election nung BJP candidate ka ama toktepba nung tamakok angu, ajisüaka tesüiba mapang cricket asayar aser tang politician akümsang, Navjot Singh Sidhu-i BJP yimsüsüba agi temulung mesüi pa menden azüngteta yutsüba ajanga iba menden atsüngtsü atema linük Tir Pranab Mukherjee-i la shimok.
La BJP nung 2015 küm nungi aden aser taküm küm tetenzüklen West Bengal Assembly elections nung takok mongutet, ta TMC candidate Laxmi Ratan Shukla-i ashi.
La Rajya Sabha nung shimokba atema BJP nem tenüngsang agütsüdang, Ganguly-i, ni linük terenlok atema inyakner aser kü tata mapa ajak kanga nendaka inyaktsü, ta ashi.
Taküm April ita nung sorkari Subramanian Swamy, Narendra Jadhav, Navjot Singh Sidhu, Suresh Gopi, Swapan Dasgupta aser Mary Kom nunger Rajya Sabha züngsem atema shim.
Sorkarisa All World Gayatri Pariwar nung tekolak Pranav Pandya-a taküm May ita Rajya Sabha züngsem asütsü shim, ajisüaka pai magizükba ajanga sorkari pa melena Shivaji’er kidong nungi jakzükba, Sambhaji Raje Rajya Sabha nung züngsem asütsü atema June 2016 nung shimok.
Sidhu-i pa Rajya Sabha nung shimoker ita asem ang lir, July 2016 nung toktsü aser iba sülen Aawaaz-e-Punjab telok tentet.
Ganguly-i Mahabharat den ano Bengali aser Hindi film aika nung shilem agia lir. Lai shilem agiba film rongnung ‘Bahar Ane Tak’ aser ‘Saugandh’ film tem-a lir. Lai Ranbir Kapoor-i tongti shilem agiba film ‘Barfi’ nung tatembangsüa shilem agia lir.