Rory McIlroy 3 buba European Tour Player sempet agizüker akümer

Dubai, December 15 (Agencies): Northern Ireland nunger golf asayar mongin, Rory McIlroy-i vote timba ngua 2015 European Tour Player of the Year sempet agizükogo.
Rory-i tan agizükba ya densema, küm 4 tsüngda nung European Tour Player of the Year sempet 3 tashi agizüker lir.
Taoba mapang tongti asayamong 4 tashi nung champion akümtsü jenjang angusang, Rory tetsüng atsüpeta taküm July ita ayongba Scottish Open asayamong nung shilem magitettsüsa aküm saka pai DP World Tour Championship takokba Dubai nung ngua Race to Dubai takok marok agizüktsü jenjang angu.
Arishi küm 26 tain Rory-i taküm February ita Dubai Desert Classic asayamong takok marok agizüka taküm küm asoshi mezüngbuba takok marok agizüker akümba sülen taküm May ita nunga WGC-Cadillac Match Play takok marok California nung agizüka liasü.
“Tan agi tasembenbuba atema European Tour Player of the Year sempet kü nem agütsüba ya ni asoshi maongka tulu lir,” ta tang World No.3 jenjang abensang, Rory-ia metetdaktsü.