Rosberg-i Belgian GP takok marok agizük

Spa-Francorchamps, August 29 (Agencies): Germany nunger Formula One (F1) gari toktepa anishir, Nico Rosberg-i alizüng mezüng tonga, Beglian Grand Prix (GP) takok marok yashi, Deobar nü agizükogo.
Tan agi pole position 3 buba jenjang nung asemben tashi atonga tenzüktsü jenjang angusang, arishi küm 31 tain Rosberg-i tetenzükba nungi 44 buba lap tashi mezüng jenjang ngua gari aniba sülen yashi tetoktepba kokadok.
Rosberg-i tan mezüngsüa Belgian GP takok marok agizüker lir aser tan takok anguba ya pai taküm 2016 küm tenzüker tanü tashi nung 6 buba takok marok agizüker lir.
Pa sülen anidaka, Red Bull telok gari anishir, Australia nunger Daniel Ricciardo-i 2 buba aser külem Mercedes telok gari anishir, Britain nunger Lewis Hamilton-i 3 buba jenjang ngua liasü.