Rotary Club-i tesayur pungo nem sempet agütsü

Mokokchung Yimpoksüi/November 29 (TYO) : Rotary House Mokokhung nung tanü Rotary International tetuyuba nung Nation Builder-2025 senpet Rotary Club of Mokokchung ajanga Mokokchung district nung tesayur tajungtiba pungo(5) shimteta  agütsüogo aser parnokji Kr.Imkongsungla Children School Mokokchung, Kr.Mapumenla Govt. Middle School Artang, Kr.Songsonginla Govt. High School Sungratsu, Wb.Meyimangyang Clark Memorial Higher Secondary School,Impur aser Wb.Wapangmeren Govt. Middle School, Yimyu liasü.

Taonung iba sentong nung tetushi tejaoker Wb.Lanuakum Lemtur Deputy Chairman, Mokokchung Municipal liasü ase pai mapang tatsüka agia jembidang tesayurtemi linük ka ajungkettsü asoshi anogoshia anibelem mesasai inyakba asoshi tesayurtem nem tenüngsang agüja liasü.

Tesayurtemji alima yangluba nung tongti shilem agirtem lir,anungji Rotary Club-i iba senpet agütsütsü asoshi tesayur shimbaji kanga dang tim, anungji tesayurtemi iba senpet agizükba ajanga ano talila mera agishia inyaktsüla ta Lanuakum-isa adenshia aliba tesayurtem ajungshia jembi.

Rotarian Wb.Allen Mark Lkr Literary Chair ajanga ketdangsüa tesayurtem nem senpet agütsü, Rotarian Wb.Imlitemsü Jamir Secretary Rotary Club Mokokchung ajanga tepela o jembi aser Rotarian Wb.Rongsentoshi Jamir President Rotary Club of Mokokchung ketdangsüba nung sentong agia liasü.