Rotary Club Mkg pur tejen tasen melentepba sentong agi

Mokokchung, August 14 (TYO): Rotary Club of Mokokchung pur 46 buba ketdangpur tejen-tasen melentepba sentong ka Aug 13 nü parnok Rotary House Mokokchung nung agiogo. Rtn. Sanjay Jain, Assistant Governor, Zone IX, RID 3240 tetushi tesemdanger ka ama arua iba sentong merakettsü.
Rtn. Sanjay Jain-i iba sentong nung mapang tatsüka agia jembidang, taoba Rotary Club Mokokchung tir Rtn. Tiarenlai anir par külem ketdangpurtemi mapa tajung aika inyakba asoshi pelaba lemsatep. Iba den ano 2019-2020 kümsük asoshi shirnoksa shimogo parnokia mapa tasen aika inyaktsü imlar, ta paisa moaja ashi.
Paisa Rotary züngsem aika aniokba den ano Rotary Foundation tashi ita aotsü atema ajaki meranga inyakdaktsünür, ta ajungshia liasü. Rotary Club Mokokchung pur 2018-2019 kümsük inyakba osangtem indang bulletin ka tetushi tesemdangerisa sayatsü. Rtn. Sanjay-isa Rotary Club of Mokokchung pur tejen-tasen melentepba maparenji ketdangsüa agitsü.
Rotary Club Mokokchung pur 2019-2020 kümsük asoshi tir Rtn. Allen Mark Longkumer aser tongti zülur Rtn. Bendangyapang na lenisüba kübok anir aotsü. Nagaland Christian Revival Church, Mokokchung Pastor Daniel-i Rotary Club Mokokchung team tasen pur asoshi temoatsü meshia sarasademtsü.
Takümji Rotary Club-i yimjung aser tebilemtsü ajema kümdaktsüba, education, tashidak balala anepaluba, merükmejuba, nübur rongsenkettsüng, tetsü aser tanur anema lidaktsüba, item luyim trok (6) dak rangloker maparen balala inyaktsü, parnok tejangraba lir.