
Dimapur, Jan 10 (TYO) : Alima ajunga nung Rotary International telok tenzükli nungi teyari nüngdakba purtem million aika asoshi temeim mapa inyakba ajaki meteta lir, ta MLA Wb. Tovihoto Aye-i 26 th Rotary International District 3240 conference shibangba sentong nung tongti tesemdanger o jembidang metetdaktsü. Rotary International mongdang sentong ya ‘Hornbill’ ta tenüng agütsür Urban Haat, Dimapur nung kaa liasü.
Alima ajaklen nüngdakba purtem yaritsü tentetba telok ka ama, Rotary International telok nung adener pei jenjang masadangi ajemalua temeim mapa tulu inyaker ta Tovihoto-isa metetdaktsü.
Anogo shia alima ya tajungba akümtsü anasai arur, ajisüaka ano alima meimchir tebilemtsü aser mangatettep adokba ajanga timtema tali agütsür, anungji tangatettertem ajak longjemer tarutsü lima junga yanglutsü asoshi khuret tuluba kümogo ta paisa metetdaktsü. Iba ama tayongzükbaji koktettsü asoshi nisung ajaki Rotary International telok aser parnok mapa tashi itdaktsütsüla ta Tovihoto-isa ayongzük.
Tanü lima nung meimchirtemi ajuruba tebilemtsü aser nisungtem alitsü asoshi alima tajungba yanglutsü merangba mapa nung shirnokisa pei taküm dang nungia taoba bilema inyaker, nisungtemi parnok dang pelatsü ta paisa ashi.
” Nai tangar nüktzü aidoktsü dang aser parnok temulungjang nung teimla aser tejak nung tepela jakden enoktsüdang, parnoki sarasademtsübaji na asoshi temoatsü asütsü”, ta paisa metetdaktsü.
India nung nisung ajaki züngtettsü aser zülutettsüsa inyaktsü asoshi Rotary purtemi mulungtetba sentongji nübortem libaliro ajungkettsü asoshi tongtibang shilem ka asütsü anungji iba sentongji sorkari aser nübortemi nungittsüla ta paisa metetdaktsü.
Nagaland ya ali telong aser tema nung akaba rongsen agir magima lir aser South East Asia limatem nungi arua kechisarina shishilemba tenzüktsü ana nung dang lir, ajisüaka ano item tajangzüktemji magiteti dang yua lir, anungji linük tesem balala nungi arua aliba business inyakertem aser tongtibang nisungtemi pei sen amshia inyaktsü mapang tajung ka lir ta sorkar tenüng nung Tovihtoisa metetdaktsü.
Paisa iba sentong takok ngua ayongzüktetba asoshi tayonger nem tenüngsang agütsü. Iba kasa lokti sentong tanep anepdang agidang, Deputy Commissioner, Dimapur, Wb.Kesonyu Yhome (IAS)-ia jembia liasü.
You must be logged in to post a comment Login