Rouhani o Castro nati sentaktepshitsü aser amaliteptsü nangzüker

Taoba Cuba lenisang, Fidel Castro (Achijilen)-i par linük semdangsang, Iran Tir, Hassan Rouhani den Havana yimtiba nung ajurutepdang agiba noksa ka yangi angur. (Havana, September 20)

Havana, September 20 (Agencies): Iran Tir, Hassan Rouhani-i Cuba semdanga, Havana yimtiba nung Cuba Tir, Raul Castro den ajurutepa yashi, Hombar nü senden menogo.
Lenir anati ajurutepdang par linük anati tanaben sentaktepshitsü aser kechisarena ajunga nung amaliteptsü nangzüktepogo.
Rouhani-i tan Havana semdangdang par linük anati temang anepalutsüren, kaketshisatsü bushitsüren aser science densema, tongti sabang balala nung amaliteptsü nangzüktepa liasü.
Rouhani-i Raul den ajurutepa senden amenba den külemi, Raul jakdang Cuba Tir menden abensang, Raul teti, Fidel Castro dena ajurutepba osang angazükogo.
“Iran lenisang, Rouhani aser Fidel nati alima tali tatsükba akümba ajanga tsüngsang mupong balaka küma melenshidaktsüba, alima nütsüng yongsük mazüokteti kanga timba akümba aser yimjung nung melitettsüsa tensa mejungi akümba den sentakba onük benoka jembiogo,” ta Cuba nung tentetba Communist Party yimtenren teloki ketdang asüba osangkaket, Granma-i sangoktsü.
“Iran aser Cuba nübur na tsüngda tanaben sentaktepshitsü tenangzükba ka Fidel aser Rouhani nati yashi agiogo,” ta kasa osang ajanga metetdaktsü.
Tawa US den tesendaktep tajungba küma yanglushiba jakdang US den mangatettep ken o benokba ajanga Iran aser Cuba na tsüngda tesendaktep junga aruba osang bushitetogo.
Iran Foreign Minister, Mohammad Javad Zarif-i Latin America semdangtsü den sentaktepa, Havana ita ka tejaklen semdangba sülen Rouhani-i tan Havana semdanga, par linük ana tsüngda tesendaktep maneni tajungba küma yanglushitsü mapatong tenzüker lir.