Royal Club-i 29 buba Raising Day anogomong mongogo

Kohima kübok Naga Solidarity Park nung Royal Club, Kohima züngsemtemi par 29 buba Raising Day anogomong pelatepa amongba sülen agiba arok noksa ka yangi angur. (Kohima, November 01)

Kohima, November 01 (TYO): Royal Club Kohima (RCK) teloki par telok tenteter küm 29 abensaba anogomong Kohima kübok Naga Solidarity Park nung tanü, Mongolbar nü pelatepa mongogo.
“RCK züngsemtemi Nagaland nung saisapongtsü talisa, football jenjang temaba jenjang nung ajungkettsütsü atema bendanga agüja inyakba atema RCK züngsem ajunga dang pelaba lemsateper,” ta Nagaland Forests, Environment & Climate Change Minister, Dr. Neikiesalie Kire-i metetdaktsü.
RCK teloki ayonger külen Nagaland nung ayonga asayaba football asayamong rong nung tongtiba, Royal Gold Cup joko küm 10 dak tema takok ngua ayongba osang bushiteta lir.
Taoba mapang takok balala anguba indang shia, RCK teloki tarutsü anogotem nunga tajungtiba agütsütsü tayongzükba olen ka Dr. Nicky-isa sangoktsü.
RCK teloki taoba mapang ama, Naga nunger talisa, lanurtem ajungmesotsüsa tongti shilem agitsü tayongzükba olen ka Retired Registrar, Nagaland University & Mission Director RMSA, Thejao Vihienuo-ia lemsatepa liasü.
Tanü sentong nung Dr. Nicky; Engineer-in-Chief, PWD, Nagaland & architect, Er. Khupi Natso aser Chief Architect, PWD, Nagaland, Khrietouzo Mepfhüo nunger densema, teshimtet RCK züngsemtem nem pei inyakba wadang nung takok anguba nüngtem nung kulikaket aser sempet/sempet agütsüba osang jangjaogo.
“RCK teloki sempet alir lanurtem anitettsü nükjidong  nung inter-district football asayamong ayongtsü sentong lir. Asen state nung football sabang temaba jenjang nung ajungkettsütsüsa telok balalai football asayamong balala ayongtsü tenzüka lir. Anungji, RCK teloki tarutsü anogotem nung Royal Gold Cup masü saka inter-district football asayamong ang ayonga agitsü tebilemba lir,” ta RCK Tir, K. Miachieo-ia metetdaktsü.