RPP-i Dimapur nung totzü meyoktepba inyakyim ka putet

Dimapur, April 22, 2022 (TYO): Nagaland nung Rising People’s Party (RPP)-i Brihostibarnü Gorapatti ward No 2 nung totzü meyoktepba inyakyim ka putetogo.

Dimapur nung küm 6 tejakdang totzü meyoktepa ayokba maparen ka puteta yimjak nung metetdaktsüba sülen yashi RPP-i Ghorapatti nung aliba truck garage ka nung totzü meyoktepba inyakyim ka putet.

Iba tesem nung petrol den kerosene meyokteper aser retail outlets nung bener oa ayoker.

Osang tejangja ka angazükba sülen media nisungtemi iba tesemi oa reprangdang totzü abenba gari ana anena liasü aser ‘zero solvent’ ta ajaba plastic bosta ka liasü. Iba mozü ya kerosene nung enokdang sentsü melenshir aser iba sülen petrol den meyokteper ta RPP-i metetdaktsü.

June 2016 nung ACAUT-i putetba kasa nisungtemi maneni totzü meyoktepba mapa inyaker aser iba garage indang kibur ya June 2016 nung tai tongloktsürtem rongnung dena lir ta RPP-isa ashi.

Nagaland nung totzü meyoktepba maparen ketdangsüa inyakba nisung indang petrol pumps 46 lir. Parnoki Assam nungi totzü bener aruba sülen iba tesem nung anener aser iba sülen petrol pump temi bener aoer. Totzü abenba gari shia nungi petrol/diesel litre 400 shi agizüker aser iba melena kerosene meyokteper, ta RPP-isa tai tongloktsü.

Yashi iba tesem nung nisung asemi petrol den kerosene meyoktepa lia apu saka tangartembo jena ao.

Par asem dang asüngdangya asüdang parnoki temabapurtemi ashiba ama mapa inyaker aser kerosene nung chemical ka meyoktep ta nangzük.

Nagaland state sorkar nem ita shia State quota ama kerosene litre 4,80,000 agütsür saka iba nungi litre lakh 4 shi ka totzü meyoktepa ayoker nisung kar keti aoer. Iba maparen ya Food & Civil Supplies (F&CS) Advisor, Director aser Dimapur Police nungertemi meteta lir, ta RPP President Joel Naga-i osangbener dang ashi.

“Onoki iba ya mita aoba masü saka police nem bushisüngdang südaktsütsü aser nübortem nem metetdaktsütsü atema inyakba mapa ka dang lir. Onoki iba atema FIR kecha mebenoktsü” ta paisa ashi.

Totzü meyoktepba maparen nungi Naga yimten teloktem, state sorkar aser ano civil society teloktemia tajangzük angur. Iba mapa inyakertemi tetsübu kecha melii dang inyaker kechiyong parnoki tongtipurtem alizüka lir, ta Joel-isa metetdaktsü.