RR & CSK nati küm 2 tashi IPL nung shilem magitettsü akok

New Delhi, July 14 (Agencies): India nung ayongba tongti cricket asayamong, Indian Premier League (IPL) nung shilem agiba telok 2, Rajasthan Royals (RR) aser Chennai Super Kings (CSK) nati taruba küm 2 tashi IPL asayamong nung shilem agitsü temeten mongutettsüsa tang jenjang ajurua lir.

India’er Supreme Court-i shimtetba bushisündangtsü luden kati RR aser CSK na kiburtem cricket den sentakba ochimashi inyakba ken o aitsüba sülen parnok nem küm 2 tashi IPL nung shilem magitsü terenemshi agütsütsü tetuyuba agüja aliba yong par telok anati küm 2 tashi IPL nung shilem magitettsüsa jenjang tamajungji ajuruogo.

India nung cricket asayatsüren ajunga ketdang asüba tentet, Board of Control for Cricket in India (BCCI)-i tan teremeshi agütsütsü tetuyubaji agizükra, RR o CSK nati taruba küm 2 tashi IPL nung shilem magitettsü.

Ajisüaka, par telok ana ya tangari alizükra, par telok anati IPL nung maneni shilem agitettsü.

“Okadak tetuyuba ajunga agizüktsü asoshi BCCI-i melunga lir. Ajisüaka, RR o CSK na den sentakba ken o kanga junga angadangba sülen ang okadaki tuyuba ama inyaktsü mesüra oda toktsütsü telemtetba agitsü renemogo,” ta BCCI Tir, Jagmohan Dalmiya-i metetdaktsü.

India Cements CSK telok kibur aser Jaipur IPL RR telok kibur lir.

Ano külen, International Cricket Council (ICC) mendenbuba & India Cements nung Managing Director, Narayanswamy Srinivasan jala’er kinüngbo, Gurunath Meiyappan aser taoba RR telok kibur, Raj Kundra nati telok kati akoktsü mesüra makoktsü ta shia sen asayaba aser asaya den sendakba miim osang sen asayar den lemsatepba ken o nung aitsüba sülen tena taküm tepiyong cricket asayabaren nung shilem magidaktsüi merenshitsü tetuyuba ka kasa ludeni agütsüogo.

“Ochimashi inyakba ajanga Cricket, BCCI aser IPL nunger nem tenüng menük tulu bener arutsüogo,” ta Supreme Court-i shimtetba luden nung mendenbuba, retired chief justice R.M. Lodha-i metetdaktsü.

2013 küm ochimashi inyakba den sentakba maparen bushisüngdangtsü luden ya Supreme Court-i taküm January ita shimteta liasü.

Iba ludeni ochimashi inyakba kuli tejangja bushitetba sülen police ketdangsertemi cricket asayar, ketdangser aser sen asayartem 20 shi apuba osanga jangjaogo.