RRS lenir dak akahba ken o nung nisung 3 puogo

Chandigarh, August 11 (Agencies): Tawa Punjab nung RSS lenir Brig. (Retd), Jagdish Gagneja dak injang kahloktsüba ken o nung Punjab Police-i nisung asem puogo.
Par asem ket nungi pistol ana aser cartridges nguogo.
Honibar aonung Jalandhar nung mejangjaba nisungtemi motorcycle nung arur ana nungi Rashtriya Swayamsevak Sangh (RSS) lenir dak injang kahloktsü. Jagdish ya tang Hero DMC Heart Institute, Ludhiana nung yaridar.
Tan hopta tetenzülen police-i melung malemba nisung ana indang CCTV noksa sayaa liasü. Police-isa aibelenertem indang osang tejangja agütsüteter nem senpet lakh 10 den Punjab police nung mapa ka agütsütsü sangdonga liasü.
CCTV noksa nung apir, aibelenertem jagi joko mapang talangka nungi 2003 küm Army nung Brigadier nungi anisüngzüksang, Jagdish anishia liasü, ta kuli sayur.
Iba tatalokba bushisüngdangtsü atema Punjab DGP, Suresh Arora-i SIT ka tenteta liasü aser iba team nung ADGP-cum-Director leniba nung züngsemji Bureau of Investigation aser IPS Sahota liasü.