RS-i BJP lenir Swamy dang pai jembiba kulitem meshi

New Delhi, May 06 (Agencies): Rajya Sabha nung AgustaWestland ken o nung o toktepdang BJP lenir, Subramanian Swamy-i jembiba o atema Rajya  Sabha-i pa dang kuli meshi.
Swamy-i komaser CBI aser ED indang mim kakettemji angu, pai anguba kakettemji tejangja asü masü, ta Congress-i tasüngdangba kaa liasü.
Rajya Sabha Deputy Chairman, PJ Kurien-i-i Swamy dang item kakettemji tejangja ta kuli sayuang, mesüra itemji Upper House record nung mayutsü ta shia  Swamy nem tanü nikongdang 6:00 ako tashi mapang agütsü.
Tang tasen shimba züngsem, Swamy-i Bodhbarnü Rajya Sabha senden nung, sen crore 3600 jenjang helicopter 12 alitsü atema tezüngzüktep agidang süpokrem euro sen million 30 agütsüogo, aser ibaji pai Italy court kakettem nung ajemdaker jembir, ta shia liasü.
Süpokrem euro sen million 30 nungjagii million 6 IAF dangi ao, euro million 8.4 bureaucrats aser crore 125 ‘AP’ dangi ao, ta Swamy-i jembia liasü.
Iba dak sentakba nung Congress Deputy Lenir, Anand Sharma-i, kanga tongtibang miim kakettem nungi züngsem ka (Swamy) nem osang kodaser metetdaktsü, ibaji House-i metettsü tim, ta ashi.
Paisa Deputy Chairman dang, “Yashi nai House züngsem ka dang item  kakettem kuli agüjang ta shiogo. Item kaket ajak indang kuli ngur ma aser House nem agütsür ma,” ta asüngdanga liasü.