RS nung CAB mebenokba atema Congress-i tenüng agir ; Sarma-ibo sasar: TMC MP temi Bengali nunger atema shisabulur

Jorhat/Guwahati, February 13 (Agencies): Bodbarnü Modi’er sorkari Rajya Sabha nung Citizenship (Amendment) Bill, 2016 benoktsü makokba atema Assam Legislative Assembly nung Opposition lennir Debabrata Saikia-i pelaba metetdaktsü.
Lokti nung telemsa adokdaktsürtemi secular India melenshitsü merangba mapa ka ano Congress-i noktangtetogo, ta Debabrata Saikia-i ashi.
Congress-i Assam aser Northeast nung alirtem tangatetba akhümtsübu aser non-NJP party tem sen tesentaktep lia mapa inyakba ajanga Modi’er sorkari Rajya Sabha nung Bill benoktsü atema tasü meiti aküm, ta paisa ashi.
Tanü Parliament indang Budget Session tatembangba anogo nung parnoki iba mapa meinyaktet.
India linük lemdangba mapang Congress-i Assam kümzüka ayu aser tanü-a Assam aser Northeast nung alirtem telemsa adokdaktsüba tashitem nungi kümzüka ayuba tongti mapa inyaker, ta Saikia-isa shisem.
Modi’er sorkari Constitution anema aser Northeast anema inyakba mapa nung tamakok ngudaktsütsüsa Congress president Rahul Gandhi-i asalentong tajung yanglu aser non-BJP party tem den meraksatetba telemtetba agi. Anungji pa nem tenüngsang agütsütsü dalang lir, ta paisa metetdaktsü.
Saikia-isa AASU, NESO, AJYCP, KMSS, Dr Hiren Gohain aser tangartemi CAB anema anibelem arema mapa inyakba atema tenüngsang agütsü.
Külen, North East Democratic Alliance (NEDA) convenor aser Assam finance minister Himanta Biswa Sarma-ibo “BJP-i Citizenship (Amendment) Bill, 2016 (CAB) kechi südir süaka agizüktsü” ta metetdaktsü.
Tanü Rajya Sabha nung BJP-i iba bill mebenoktetaka Sarma-ibo iba Bill posema jembi.
“BJP-i CAB agizüktsü atema nangzüka lir aser Lok Sabha election nung iba ya tongtipang onük ka ser tokteptsü. Rajya Sabha nung onok kodang nübo teimba kümdir, idangji onoki CAB agizüktsü aser teti atema ozüng yanglutsü” ta pai ashi.
Rajya Sabha nung CAB mebenoktetbaji Assamese nungeri tamakok anguba lir, ta Sarma-isa shisem.
“Bill ya magizükra 2021 Assam Assembly election nung Assam kübok middle aser lower tesemtem nung menden 17 shi Bangladeshi Muslims keti aotsü. Iba mapang shibai Assamese kin kümzüktsü? Assamese nunger, oshi maliba mapang ka ajurudang shibai mapa inyaktsü?” ta Sarma-isa asüngdang.
Maneni, Trinamool Congress-ibo BJP dak tai tonglokja ‘parnoki (BJP)-i Assam nung politics tamajung asayar” ta ashi.
Centre-i Assam nung aliba Bengali nunger kümzüka ayutsüla, ta paisa TMC-isa metetdaktsü.
Lok Sabha indang Zero Hour nung Trinamool Congress (TMC) MP tem- Dinesh Trivedi aser Adhir Ranjan Chowdhury nati ashiba agi, northeast kübok state tem nung Bengali nunger lendongbang ka nung alir.
“Onoki Assam nung Bengali nunger taochi melii tepsetba nguogo. Onok teshimtet teloki tesem tonga oagi Bengali nunger tepsetba osang tejangja metetpelaogo” ta TMC MP Trivedi-i ashi.
“BJP-i tasa tamajung atong inyakba politics anentsüla. Nenoki Assam nung Bengali nunger tepsetba anentsüla” ta paisa ashi.
Bengali nungertemi West Bengal toktsür pei taküm liyonga aotsü atema Assam nung alir saka parnok tetsübu tia ka nung lir, ta Chowdhury-ia ashi.
“Assam nung Bengali nunger tepseter. Centre-i state dang parnok kümzüka ayutsü atema tetuyuba agütsütsüla” ta paisa shisem.