RS nung Juvenile Justice Bill agizükogo

New Delhi, December 22 (Agencies): Joko tang nungibo Juveniles (arishi küm 18 tekübokpur) süaka arishi küm 16 nungi 18 tsüngdapurtembo aibelen ken o tulu atema taintem den kasa ken o akatsü, kechiyong tanü Parliament nung Juvenile Justice (Care and Protection of Children) Bill agizükogo.
2012 küm December 16 nü tebur telok kati tetsür ka tashiyim amshia raksatsüba ken o nung aija alir rongnung ‘juvenile’ ka yashi chioka liasü.
Juvenile Justice (Care and Protection of Children) Bill ajanga tain ama ken o akatsü arishi küm 18 nungi küm 16 tashi ajema aludaktsür. Iba bill ya Lok Sabha nungbo agizüka liasü aser tanü Rajya Sabha nung Left party temi senden nungi ayazüka aluba sülen voice vote ajanga iba bill agizükogo.
Left party temibo iba bill ya Select Committee ka matsüngdang benoknüa liasü.
Iba bill nung o atsütepba mapang Women & Child Development (WCD) Union Minister, Maneka Gandhi-i, iba ozüng ya khenyongi balaka lir, aser aibelen meinyaktsü atema kanga nüngdaka aliba ozüng ka lir, ta ashi.
Laisa, linük nung arishi küm 16 purtemi aibelen tulu inyakba kanga züiner ta shia item aibelen balala indang osang tejangja agüja liasü.