RSP-i CM atema Fadnavis mesüra Uddhav shimtsü: Jankar

Shirdi (Maharashtra), April 20 (Agencies): Tanü Rashtriya Samaj Paksha (RSP) tongti, Mahadev Jankar-i, taruba Maharashtra asssembly election nung par party-i tajemba agi menden 25 nungbosa takok angutsü aser chief minister atema Devendra Fadnavis mesüra Uddhav Thackeray shimtsüji parnoki lemtettsü, ta ashi.

Jankar-isa, pai tang teinyaktak, Baramati MP, Supriya Sule madak takok ngua taruba general election nung pa MP akumtsü, ta ashi.

Yashi osangbenertem den jembidang Jankar-i, “Maharashtra assembly election nung ozü par party-i tajemba agi menden 25 nungbosa takok angutsü, iba sülen Devendra Fadnavis mesüra Uddhav Thackeray na shiba chief minister akumtsü’ar ibaji onoki lemtettsü,” ta ashi.

Züngsem 288 aliba Maharashtra Legislative Assembly nung RSP MLA ka dang lir.

Jankar ya Dhangar kin nungi tongtibang lenir ka lir aser pai, “Maharashtra nung nübur shilem 22 bo Dhangar kin nungi lir, aser ozü party-i vote shilem ana danga nguaka state yimtenren nung onoki tongtibang shilem ka agitettsü,” ta ashi.

Tamalen Ato kilonser Narendra Modi-i, Jankar-i NCP tongti (Sharad Yadav) dang nungi shisatsü agir ta jembiba dak sentakba nung tasüngdangba ka langzüdang Mahadev Jankar-i, “”Ni Ato kilonser dak sentakba nung mejembiner, ajisüaka taoba mapang ni kodanga Sharad Pawar dang nungi shisatsü magi, aser tarutsü nunga magitsü,” ta ashi.