RSS aser BJP nati rejutem samatsütsü meranger: NPCC

Dimapur, Feb. 20 (TYO): RSS aser BJP nati lokti, social, secular aser democratic tangatetba aser tesayubatem agütsüba rejutem shibangtsütsü sentong atonga inyaker aser tang JNU onük ya parnoki atonga inyakba mapa ka lir. RSS aser BJP-i democratic institution ajak raksatsütsü meranger, ta NPCC Tir, K Therie-i Honibarnü sangdong ka nung metetdaktsü.
BJP ainba ya linük asoshi aser talisa asenok ama nütsüng yongsük agi tangar memenepba loktitem asoshi lendong keta lir. RSS tanishisangi, tang amshiba India linük nisan ya mamshitsüla aser iba melena ‘saffron’ sentsü indang nisan melentsüla, ta ashir. Iba ama tangatetba yur mapa inyakbaji asenoki noktangtsüla. BJP sorkari tasa atonger democratic institutions raksatsüba inyakyim onoki (Congress) aitsür, ta K Therie-isa sangdong nung shia lir.
Feb. 9, 2016 nü JNU nung Democratic Student Union (DSU) Tir-i linük anema yimyim ayim ta tai tonglokja aliba onük pusema Nagaland BJP-ia ola adokogo. DSU ya CPM indang kaketshir tentet lir aser parnoki Maoism tangatetba sülen anidaker. DSU-i süngzü agi nisung alena südaktsüba temerenshi anema senden ka amentsü ayongzük ta onoki angazüker, ta NPCC Tirisa ashi.
Tasüba temerenshiji meimchiryim anema lir aser iba temerenshi ya Afzal Guru aser Mumbai bomb pokdaktsüba nung tai tonglokja alir Yakub Memon mesüra tangar shinga nema magütsütsüla, ta DSU-i noktaker.
JNU compound nung aliba Badminton Stadium nung DNU nem sentong ayongzüktsü temelaba agütsü aser ashishitep ken o madokdaktsütsü atema ketdangsertemi DNU pur dang microphone mamshitsü tenokdangba agütsü aser parnokia ibaji agizük. Ajisüaka, JNU nung ABVP (RSS aser BJP Student Union)-i JNU ketdangsertem dang DNU nem temelaba agütsüba meyipa agiang ta takhangba agütsü aser iba jagi JNU ketdangsertemi temelabaji agien, ta Therie-isa ashi.
Ajisüaka, idangjibo DSU züngsemtem den J&K nungi aruba kaketshirtem timba ka sentong agidak adenshir liasü. Idangji ABVP züngsemtemi DSU sentong agidaki yimyim ayima ao aser idakji sentepa alirtem den rara mena.
Parnoki linük anema yimyim kecha mayim ta DSU-i ashir aser parnokisa TV channel nung sayuba film ji nisung kari yanglushir sayuba lir ta aitsür. Ajisüaka, iba indang kuliji ano mejangjateti lir, ta NPCC Tirisa sangdong nung shia lir.
RSS-i FII, TERI aser tanga shisaliok dak sendakba rejutem aika anema mapa inyaker. Dalit nunger Rohit Vemula soseta asüba onük nunga parnok nem tai tonglokja lir aser parnoki school kakettem zülushir. Ano külen, BJP Minister temi Gita ji National Holy Book ta amshitsü atema mapa inyaker, ta Therie-isa aitsü.
JNU ya Pt. Jawaharlal Nehru nüngtem nung tenzükba reju ka lir aser pai social, secular aser democratic tangatetba nung mapa inyak. Tang ABVP-i JNU shibangtsü atema takhangba agütsür. Tang adokba JNU onük ya RSS aser BJP nati tasa atonga inyakba mapa ka lir aser parnoki India nung democratic institution ajak samatsütsü meranger, ta paisa metetdaktsü.