RSS aser BJP teloktemi linük mezüngmeshir:Congress

New Delhi, April 03 (Agencies) : BJP aser parnok den tebilemba ajemer, RSS teloktemi linük temaitsütem mezüngmeshia amshiba den linük nüjiso anguba otsü perepsa-a India lemdangtsü meranger, ta Deobarnü Congress-i iba telok ana aija shiogo.
Rashtriya Swayamsevak Sangh (RSS) lenir Sarkaryavah Bhaiyyaji Joshi-i, ‘Jana Gana Mana’ ken ya ‘rajya’ (jenjang) aser ‘Vande Mataram’ ken ya India sobaliba jangjatsüba aser asenoki linük meimba jenjang sayuba kentem lir, ta ashi.
“Bharatiya Janata Party aser RSS telok nati ita 23 tashi linük temaitsü mezüngmeshia linük lemdangtsü inyakyim benoker. Bhaiyyaji Joshi-i yimjak nung linük wako mezüngmeshiogo. Joko RSS-i nüjiso atema raraba otsü mezüngshiba tang temai adoka meteter,” ta Congress nungi otongdar Randeep Singh Surjewala-i ashi.
Pai, “Joshi-i linük naklu ken (Jana Gana Mana) aser linük ken (Vande Mataram) na mezüngshi-i jembiogo. Pai linük naklu ken ajanga linük ken agi linük meimba aser linük atema bendanga agütsüba jangjatsüba ama mejangjatsür ta ashi. Ibaji linük nüjiso otsü perepsatsü oyim lir,” ta shisem.
RSS lenir Joshi-isa, “Kodang iba ken ana shitakba tetetzü medemdangdir, Vande Mataram ya ang linük naklu ken lir, kechiyong iba ken ya ang linük nung inyakyima aruba den tapet lir,” ta ashi.
Paisa, Linük wako ya ‘state flag’ aser ‘saffron flag’ ya tesüiba mapang sobaliba temaitsü lir, ta ashi.
“Constituent Assembly-i sentsü asem (tiranga) ji state wako asütsü atema shimtet, ajisüaka tesülen Republic of India wako aküm. Linük tenüng nung amshiba temaitsü ya ajaki ozüng ka ama akhümtsübur. Ajisüaka ‘saffron flag’ yabo akhi alemli nungi Bharat nüburtemi sobaliba temaitsü amai amshia aru. Asenoki wako anaprongla meima aser akhümtsübua amshir,” ta Joshi-i ashi.