RSS, BJP dang nungi linük meimba angazüktsü menüngdak: Rahul

Rae Bareli, February 19 (Agencies): Hokolbarnü Congress tatong Tir, Rahul Gandhi-i, RSS aser BJP na dang nungi linük ni meimtsü lesson angazüktsü menüngdak, ta ashi.

Rahul-i JNU kaketshirtem pusemba atema BJP-i lungkak aitba dak sentakba nung tasüngdangba ka langzüdang Rahul-i, “Ni BJP aser RSS dang nungi angazüktsü menüngdak. Linük meimtsüji kü azü nung lir,” ta ashi.

“Melung masürtem ola sota ayutsü merangba tensa ka tang linük nung lir,” ta paisa ashi.

Pa constituency Amethi kübok aliba Salon nung aluyimertem den jembidang Rahul-i, “Tang mezüng menjang nung jenjang tuogo. Sorkari (BJP) nangzükbatem nung tamakok nguogo. Pai (Ato kilonser Narendra Modi) aluyimer shia nem sen lakh 15 agütsütsüla, mesüra menden toktsütsüla,” ta ashi.

“Aluyimertem dak sentakba onüktem ni Parliament nung süoka jembitsü,” ta pai ashi.

Brihostibarnü Rahul-i, JNU ken o aser Patiala House court nung rara adokbaji ajanga India tenüng menüktsür ta shia Tir, Pranab Mukherjee dang linük nung ozüng mebenoktetba aser temeten nokdangba anema inyakdaktsüner ta mepishia liasü.

Yashi Delhi nung osangbenertem den jembidang Rahul-i, “Asen shisaliok rejutem raksatsütsü aser kaketshirtem ola nokdangtsüji sorkar mapa ka masü. India tesem ajaklen RSS-i kaketshirtem matsüngdang parnok tangatetba benoktsü meranger,” ta aija liasü.

Rahul-isa, “Linük meimba shisatsüji kü azü nung lir aser ozü kibongi taküm tenla agütsüpet agütsüba ni nguogo,” ta jembia liasü.