RSS, BJP-i Hindu linük kümdaktsütsü atema inyaker: Yechury

Thiruvananthapuram (Kerala), March 24 (Agencies): Hokolbarnü CPI-M General Secretary, Sitaram Yechury-i, BJP aser RSS nati parnok onük, ‘Hindu linük’ atema inyaker, iba den külemi state kar nungbo tamangba yimsü nung ajemdaker telemsa adokdaktsür, ta aitsü.
Paisa, Bharatiya Janata Party aser Rashtriya Swayamsevak Sangh napronglai Kerala aser Tripura na nung Communist Party of India-Marxist nung inyakertem anema inyaker, kechiyong par party-i parnok onük ‘Hindu linük’ atema inyakba maneni aija arur, ta ashi.
“Parnoki tamangba yimsü nung ajemdaker telemsa adokdaktsür aser rara adokdaktsür. Kerala nung küm aika parnoki onok anema inyaker; aser tang parnoki Tripura aser West Bengal nung ozü sorkar atsüngdoktsü atema inyaker, iba ya süoki ia agitsü onük ka lir,” ta pai ashi.
Tanü Kerala yimtiba, Thiruvananthapuram nung osangbenertem den jembidang Yechury-i, CPI-M-i democracy inyakyim ajanga iba onük asoshi inyaktsü, ta ashi.
Pai ashiba agi, BJP-i Parliament nung inyakyim tem anema inyaker.
“Rajya Sabha nung külem züngsem kati kü dang, sorkari tanü Lok Sabha nung private members bills sülen Finance Bill benoktsü lemtetogo ta metetdaktsüogo,” ta pai ashi.
“Iba amaji kodanga matalokdang. BJP-i Parliamentary inyakyim mezüngshir. Parnok Rajya Sabha nung züngsem peria maliba ajanga parnoki item ajak ya inyaker,” ta paisa shisem.
CPI-M lenirisa, Uttar Pradesh nung Chief Minister tasen, Yogi Adityanath-i mapa agizükba mapang nungi tenzüka state tensa mejungi kümogo, ta ashi.
“RSS aser peisasa shimba vigilantes-i tangbo parnok ket nung ozüng amer aser nashi tepsetba kitem shibangtsür. Iba onük nung ozüng junga lateta lir, saka chief minister tasenba sülen ibaji mebenshir,” ta paisa ashi.
“Election magidang BJP-i Yogi Adityanath ji par chief minister candidate asutsü ta sangdong asübo parnoki Uttar Pradesh sorkar mekümla,” ta paisa ashi.