RSS & BJP nati NE nung Congress sorkartem anema inyaker: Tuki

New Delhi, Feb. 20 (Agencies): Honibarnü taoba Arunachal Pradesh chief minister, Nabam Tuki-i, RSS aser BJP nati Congress sorkar loksatsütsü aser Northeast nung Congress sorkartem atsüngdoktsü meranger, ta metetdaktsü.
Arunachal Pradesh Angh, J P Rajkhowa aser Union Minister Kiren Rijiju nati loktiyimten inyakyim ajanga shimtetba sorkar atsüngdok, ta Tuki-i aitsü.
“Sorkar dak temulung masüba onükji RSS aser BJP nati teyari agüja adokdaktsü. Parnoki Northeast nung Congress sorkar ajak atsüngdoktsü meranger. RSS aser BJP nati Congress nung temulung masüba MLA tem amshia mapa inyak,” ta New Delhi nung osangbener senden ka nung Tuki-i metetdaktsü.
Iba senden nung Arunachal nung taoba Chief Minister Tuki den pa pusemer MLA 26 dena liasü aser paisa ashiba agi, NDA-i kodangsa sorkar tashi ngudir Arunachal Pradesh nung sorkar tenteta alibatem raksatsür.
Tesüiba mapang NDA-i taoba Chief Ministers- Gegong Apang aser Mukut Mithi nati aniba sorkartem raksatsü, ta paisa aitsü.
Angh Rajkhowa-i Congress sorkar atsüngdoktsü atema democracy aser Linük Temzüng ajembanga mapa inyak aser Union Minister of State for Home Kiren Rijiju-i pa anema noktakba MLA pusema aser ajungmesoa mapa inyak, ta Tuki-isa aitsü.
Taoba Congress MP Takam Sanjay-ia Rajkhowa Angh menden nungi agientsü atema takhangba agüja jembidang, Arunachal nung democracy aser Linük Temzüng mali kümkdaktsüogo aser iba ajanga arrtsü anasa aliba state nung law & order khuret adoktsü, ta ashi.
“Modiji, yimlibilema onok second class citizen ama tamshi. Onok tangar ama India nungersa lir. Arunachal Pradesh ji Jammu & Kashmir ama kümdaktsütsü temerang” ta Takam Sanjay-isa metetdaktsü.
Northeast nung Manipur, Assam, Meghalaya aser Mizoram state tem nung Congress sorkartem lir.