RSS Headquarters, Nagpur nungi J&K yimsüsür: Omar Abdullah

Jammu, June 17 (Agencies): National Conference Tir aser taoba Jammu & Kashmir Chief Minister, Omar Abdullah-i, Jammu & Kashmir sorkar ya Nagpur nung aliba RSS headquarters nungi yimsü asür aser right wing tenteti anogoshia state Chief Minister, Mehbooba Mufti nem tetuyuba balala agütsür, ta ashi.

June 22 nü election agitsü aliba Anantnag Assembly tesem nung election nüboyim sentongtem nung jembidang Omar-i, “Tanübo state indang remote control ji Nagpur (RSS headquarters) nung lir, aser anogoshia Mehbooba Mufti-i RSS headquarters nungi tetuyubatem angur,” ta aitsü.

Mehbooba ya Anantnag nungi PDP candidate lir.

Omar-isa, iba by-election ya “Kashmir tangatetba” aser “Nagpur tangatetba” na tsüngda rara ka lir, ta ashi.

Omar-i Mehbooba dang, la opposition lenir alidang yimyim ayimbatem tu bilemtetang, ta ashi.

Paisa ashiba agi, state nung PDP-BJP teloktepji Mehbooba-i yanglu aser New Delhi nung PDP aser BJP lenirtem mezüngbuba senden nung lai-a shilem agiogo.

Mehbooba-i sorkar tashi arishidang la tenangzükbatem amatokogo ta aija Omar-i, “J&K nungi BJP meintoktsü atema PDP nem vote agütsütsüji tongtibang ta lai election nung jembiba onüktem asenoki tang tashi bilemteter,” ta ashi.

“Tanübo mezüngmeshiba tulutibaji- J&K nung PDP-BJP teloktep nung la tekolak,” ta paisa aitsü.