RSS-i benokba onüktem anema Modi-i menoktakteter: Rahul

New Delhi, September 17 (Agencies): Yashi nungi tenzüka anogo ananü Youth Congress senden amenba mapang Bodhbar nü Congress Party tatong Tir Rahul Gandhi-i, RSS-i parnok onüktem benokba anema Ato kilonser Narendra Modi densema BJP lenirtemi menoktakteter, ta ashi.

Land Bill dak sentakba nung sorkar aija Rahul-i, NDA sorkari Land Ordinance agientsüsa akum, kechiyong parnoki stakeholders den melemsatepi iba ya benoktsü merang, ajisüaka 2013 küm Congress-ibo ajak den lemsatepba sülenang iba bill benok, ta ashiba osang ka ajanga metetdaktsü.

Sorkari iba ordinance agientsüsa Youth Congress nung inyakertemi iba anema noktakba atema Rahul-i parnok nem tenüngsang agütsü.

Youth Congress senden tembangnü party nung inyaker kati asüngdangba ka langzüdang Gandhi-i, “RSS-i parnok onüktem teti benoker. BJP-i parnoki (RSS) ashiba teti angar. BJP-i RSS anema menoktakteter. Ato kilonser Narendra Modi-ia anema menoktakteter,” ta ashi.

Party tentet dak sentakba nung jembidang Gandhi-i Youth Congress nung inyakertem dang, tarutsü nung Centre aser state tem nung Congress tashii arutsüji party nung lanurtem dak keta lir, ta ashi.

Iba senden nung osangbener tembo mejaok, aser item senden nung state unit balala nung Youth Congress-i inyaktetba asadangba den külemi tarutsü atema sentongtem lemsatepogo.

Senden tembangba sülen telecom minister Ravi Shankar Prasad’er kima adenshia sorkari taoba Ato kilonser ana- Indira Gandhi aser Rajiv Gandhi na indang stamps anentsüba anema lungkak aittsü lemteta liasü.