RSS-i centre 5,000 nung tanurtem atema Sunday class tenzüktsü

New Delhi, April 20 (Agencies): Tanü lanurtemi linük atema mebilemba atema tebilemtsü kaja RSS-i ‘Balagokulam’ mapatong tenzüka linük nung tongtibang yimtitem aser jila ajak nung tanurtem nem tesayuba agütsütsü sentong lir.

Tawa office ketdangpurtem senden ka amendang Rashtriya Swayamsevak Sangh (RSS)-i hopta shia ‘Balagokulam’ kübok arishi küm 18 tashi tanurtem atema Deobarshia Hindu otsütem nung ajemdaker sobaliba aser moral science class tem agitsü lemtetogo. Ibaji June mezüngnü nungi tenzüka linük tesem 5,000 shi nung agitsü, ta RSS telung osang ka ajanga metetdaktsü.

Kerala nung 1975 küm RSS tenzükba sülen parnoki 1981 küm linük tesem kar nung Balagokulam tenzüka liasü.

Kerala unit RSS-i state aser yimti tulu aika nung iba mapatong ya tenzüka liasü aser parnoki jila aser yimtsüng ajak nung iba class tenzüktsü aser oshi class den külemi puti otsü sayutsü atema pracharaks aser mid-level tesayurtem bushitsü metetdaktsüogo.

Item class ji pracharaks tem indang ki aser community halls nung agitsü. Iba class nung tanurtemi ‘Hindu way of Life’ indang angazüktsü aser benshitsü sayuba den loktiliba indang sayutsü, ta parnok osang ka ajanga ashi.

Class temji hopta nung khen- ghonda ana agitsü, kong India nunger sobaliba saisapong, puranas, bhajans aser shlokas nungi otsütem, dharma tesayubatem den külemi linük meimtsü tesayuba aser medemer tajung yimtettsü atema sayutsü, ta kasa osang ajanga ashi.

“Tang Kerala aser yimti kar nung Malayalee kibongtemi Balagokulams ketdangsüa tagitak lir, ajisüaka ano tanga state nung prokshiner,” ta RSS indang India Sah-Prachar Pramukh, J Nandakumar-i ashi.

Pai ashiba agi, iba mapatong ya Kerala nung kanga takok ngua odar aser tanga state tem nunga benoktsü nüngdaker.

Hindu puti otsütem aser Hindu way of life dak alia tanurtem dang pei tetsü oshi jembitsü aser Sanskrit angazüktsü ajungshitsü.