RSS-i kaket rejutem parnok kübok yuner: Rahul

New Delhi, August 13 (Agencies): Film Television Institute of India (FTII) kaketshirtemi joko mapang talangka lungkak aita arudangi, aser iba atema Narendra Modi’er sorkar aija tanü Congress tatong Tir Rahul Gandhi-i, RSS-i kaket rejutem ajak agia parnok kübok yuner aser Ato kilonser nüngsang kentem dang atenba den BJP temaba jenjang nung yutsür, ta ashi.

FTII mendenbuba atema actor, Gajendra Chauhan shimba anema Rahul Gandhi lenisüba nung Congress nungi teshimtet telok kati Tir Pranab Mukherjee ajurui aoba mapang pai osangbenertem dang, RSS-i kaket rejutem parnok kübok yunüba ajanga purapitetbatem jenjang raksatsür, ta ashi.

New Delhi nung osangbenertem dang Congress lenirisa, “Parnok (kaketshirtem) madak temaba nung yuja alirtemji temaba jenjang nung alitsü malang. Parnoki alangzüka aliba jenjangji, parnoki Ato kilonser aser BJP nüngsang kentem tenogo, aser (parnoki) RSS tangatetba nung amanger,” ta ashi.

FTII yimsüsütsü atema Chauhan metemsü ta shia Gandhi-i, sorkar sangdongji- “nü tashi aser jenjangji tesülen tokjang aser Modi o RSS na külemer iba reju yagi arung’ lir, ta aitsü.

“Iba ya kaketshirtem atema tangatetba tai ka agütsür lir,” ta pai ashi.

Anogo ishika jakdang Rahul-i Pune nung Film and Television Institute of India (FTII) campus semdanga Chauhan iba menden nungi aludaktsüner kaketshirtem ajura liasü.

Iba mapang nung pai kaketshirtem dang, “Vyapam ochimashi ken o ajanga parnoki Madhya Pradesh nung education system raksatsüogo. Parnoki kaket rejutem raksatsübaji onoki memelatsü,” ta ashi.

“RSS-i educational institution tem agiba ya yimtenren ken o ka lir. Ni iba ya yimtrenren tajangzük atema mamshir saka BJP-i yimtenren tajangzük asoshi amshir,” ta ashi.

Rashtrapati Bhawan-i Tir ajurui aortem rongnung Rahul den Congress lenirtem- Mani Shankar Aiyar, Manish Tewari, Kumari Selja aser Raj Babbar nunger densema liasü.

“Onoki Tir nem FTII onük indang metetdaktsüogo,” ta paisa ashi.

FTII mendenbuba atema Chauhan shimba sangdongba sülen kaketshirtemi pa dak tazüngba kuli aser mangdang mali ta shia ita ana dak tali lungkak aita arudagi.