Thiruvananthapuram (Kerala), January 14 (Agencies): Taoba December ita nung Rashtriya Swayamsevak Sangh (RSS)-i Khristan lenirtem den senden ka menogo aser parnoki Khriata telen/kongsang ka tentettsü atema inyakdar.
RSS-i Khristan wing ka tenzüktsü lemtetba dak sentakba nung Brihostibar nü Syro Malankara Catholic Church tekolak-i, “Parnoki kechisa latettsüdir onoki repranga dang atatsü,” ta ashi.
“Parnoki benokba nung ajemdaker ang agizüktsü mesüra magizüktsü. Anungji parnoki kechisa latettsüdir repranga dang atatsü,” ta Moran Mar Baselios Cleemis Catholicos-i osangbenertem dang ashi.
“Tang tashi ni ano mejangjar, anungji onoki inyaktsü atema tajungtibaji- parnoki kechi inyakner’ar repranga atadi,” ta paisa shisem.
BJP sorkar yimsüsüba kübok linük nung akhümtsübutep mali ta aitsüba aser yimtenren party temi RSS ji sorkar nem shisa agütsür telok ta aitsüba mapang ka nung RSS-i iba mera agidar.
Delhi densema India linük tesem balala nung Khristan tem Tenla ki aika amakba ajanga alimai aitsüba mapang nungi tenzüka Modi’er sorkari Khristan tem dang junga benshitsü merangba mapang ka nung RSS-ia iba mera agir.
You must be logged in to post a comment Login