RSS-i Khristan telok ka tentettsü atonger

New Delhi, January 04 (Agencies): Küm 10 tejaklen Muslim Rashtriya Manch tentetba ama Khristantem indanga telok ka tentettsü nükjidong nung Rashtriya Swayamsevak Sangh (RSS)-i Khristan lenirtem den senden ka agiogo.
Osang ajanga ashiba agi, tentet nüngjajibo ano melemtet saka Khristian tem den apu alatsü asoshi Rashtriya Isai Manch ama ka tentettsü tebilemba lir.
Muslim Rashtriya Manch ‘Margdarshak’ (len sayur) aser senior RSS Pracharak kati, Economic Times (ET) dang, Khristan tem den ibaji latettsü atema merangdar aser iba nükjidong nung December 17, 2015 nü Khristan lenirtem den senden ka menogo, ta metetdaktsü.
“December 17 nü state 10-12 nungi Archbishops 5, Reverend Bishops 40-50 shi den senden menogo aser maparen ka tenzüktsü atema lemtetogo. Iba ya telok ka tentettsü atema tamentakdak renemba ka lir,” ta RSS National Executive züngsem, Indresh Kumar-i ET dang ashi.
RSS ajanga Khristan putirtem den tongtepa inyaktepba ya tang mezüng asütsü.
December 17, 2015 nü New Delhi nung agiba senden ya Indresh Kumar lenisüba nung agia liasü aser iba senden nung Vishva Hindu Parishad (VHP) nungi Chinmayananda Swami-a liasü.
Iba senden nungsa Archbishop, Mar Kuriakose Bharanikulangara, Gurgaon diocese nungi Bishop, Jacob Mar Barnabas, Delhi diocese nungi Bishop, Issac Osthatheous aser Church of North India nung general secretary, Alwan Masih nungera dena liasü.
BJP sorkar yimsüsüba kübok linük nung akhümtsübutep maliba tali züiner ta aitsüba den külemi yimtenren party temi RSS ji sorkar nem shisa agütsür telok ta aitsüba mapang ka nung iba osang tasen angashir.
Ajisüaka iba tentetji Muslim Rashtriya Manch ama asütsü tabo Kumar-i mashi saka pai, “Muslim Rashtriya Manch ya Muslim ajanga, Muslim atema aser Muslims nunger atema. Ni parnok len anir dang,” ta ashi.
Delhi densema India linük tesem balala nung Tenla ki aika amakba ajanga alimai aitsüba mapang nungi tenzüka Modi’er sorkari Khristan tem dang junga benshitsü merangba mapang ka nung RSS-ia iba mera agiogo.
Taoba ita Catholic Bishops Conference of India-i ayongba Khristmas benjungmung sentong ka nung jembidang Union Home Minister, Rajnath Singh-i, pai Khristan tem anema meinyakdaktsütsü ta ashiba den külemi Tenla kitem amakba ajanga pa temulung kanga yirur, ta lemsatepa liasü.