RSS-i linük Temzüng tashi amertem ama inyaker: D Raja

Coimbatore, October 02 (Agencies): Tanü CPI National secretary, D Raja-i, RSS-i Narendra Modi-i aniba NDA sorkar dang tetuyubatem agütsüba ajanga linük yimsüsüba azüoktsü meranger, ta aitsüogo.

“Tang RSS-i Central shilem agir aser yimsüsüba nung taka amouktsü atema meranger, aser ibaji linük temzüng tashi amer tentet tali ka ama inyaker lir,” ta Raja-i Coimbatore nung osangbenertem dang ashi.

Minority (Muslim) tamangba yimsü nungi tebur kati nashi tepset ta tai tonglokja tepset aser ano nisung kati Ambedkar indang ken ka phone ringtone atema amshi ta tai tonglokja tepsetogo, ta shia Raja-i, Dalits aser Minority tem tetsübu nung liteper, ta ashi.

Iba dak alia Rationalist, Narendra Dabolkar, Maharashtra nung communist lenir Govind Pansare aser Karnataka nungi shisashir, M M Kalburgi nungera tepsetogo, ta CPI National secretary-isa shi.

Pai ashiba agi, party-i Pansare asoba anogomung, November 24 nü linük tesem ajunga nung lungkak aita nüburtem dang Sangh Parivar sentongtem jungkai adoka metetdaktsütsü.

Ato kilonser Modi-i bendang linüktem maneni semdangba dak sentakba nung Raja-i, “Iba ya ‘Make in India campaign masü, saka ‘Make profit in India’ lir, aser iba atemaji pai corporates aser MNC tem dang linük nung sen intoka shishilembatsü ayonger,” ta ashi.