RSS-i Muslim nunger magizüktettsü: Mayawati

New Delhi, Rongjui/September 20 (Agencies): Muslim nungeri Ayodhya nung Ram tekülem ki melunga yanglutsü nunga RSS-i Muslim nunger kodanga magizüktettsü, ta tanü Bahujan Samaj Party (BSP) tongti, Mayawati-i ashi.
Narendra Modi-i aniba sorkari ‘triple talaq’ ozüng agizükba aija Mamata-i, iba ya yimtenren dak sendakba nung agiba telemtetba lir, ta aitsü.
Yashi Rashtriya Swayamsevak Sangh (RSS) tongti, Mohan Bhagwat-i, Muslim nungeri Uttar Pradesh nung aliba Ayodhya nung Ram tekülem ki yanglutsüra ibaji ajanga Hindu aser Muslim nunger tsüngda tsükchitep anentsü, ta ashi, aser iba dak sendakba nung tanü Mamata-i sangdong ka ajanga, “Onokibo iba nungji ai-aura makar. Muslim nungeri tekülem ki aika yanglutsüaka Hindu nungeri Muslim nunger den apu malatsü, kechiyong parnok melungsentsü nung Muslim nunger anemba, Dalit nunger anemba aser minorities anemba melungsentsü lir,” ta ashi.
RSS aser BJP lenirtemi tamangba yimsü nung ajemdaker telemsa adokdaktsütsü meranger, anungji ibaji mita atatsüla, kechiyong parnok jembiba aser inyakba na balala, ta laisa ashi.