RSS-i Northeast nung temelenshi bener arutsü: Bhagawat

Itanagar, Luroi/August 21 (Agencies): Rashtriya Swayamsevak Sangh (RSS) tekolakba Mohan Bhagawat-i Mongolbarnü ashiba agi, par party-i maneni meranga inyakba ajanga Northeast nung terenlok bener aruogo.
Nagpur nung kaket sayaba sentong ka nung o jembiba mapang Bhagawat-i ashiba agi, RSS puri Northeast nung aliba nüburtemi parnok aliba tesem sentoktsü ta tsübua bilemba tetsübu agintsüogo.
RSS tekolakbaisa, Assam nung aliba nüburtemi mapang ka nungbo par state ya Kashmir ama akümtsü ta tsübua bilema liasü, ta ashi.
Paisa, RSS puri “asenok ka dang aser asenok ajak India nung shilem ka” ta tebilemba ka Northeast nung aliba nuburtem nem agütsüogo, ta ashi.
Delhi aser linük nung tanga tesem semdanga senzüba mapang Arunachal Pradesh nungertem ya China nunger ta bilemba ngua temulung mepelai bilemba Bhagawat-i lemsatepa liasü.
Paisa India nung lokti balala tsüngda tebilemtsü ya parnok yongtsü nung telungjem maliba ajanga lir, ta ashi.
RSS tekolakbai ashiba agi, India nung telungjem maliba ya bendangertemi India maka atsüngba ajanga lir.
China tateshitsü amshia Bhagawat-i ashiba agi, par linüki Arunachal nungertem atsüa arutsü meranger.
Arunachal Pradesh nunger temi parnok India meyong lir ta China dang ashir, ta pai ashi.
Maneni Bhagawat-i ashiba agi, Arunachal Pradesh nung Khristantemia RSS indang uniform semer Sangh indang path-sanchalan programme nung shilem agiba den Bharat Mata Ki Jai ta ayimba nguogo.
Paisa, RSS kübok nisung ishikati shilem tajung agiba ajanga Northeast nung temelenshi tulu bener aruba nguogo, koba tanga teloktemi küm tenem tejakdang inyak tenzükogo, ta ashi.
RSS tekolakbai ‘Shubharambh’ ta nüngja agütsür Nandkumar Joshi-i pa Arunachal Pradesh nung inyakba mapang ajangshiba indang kaket ka sayaja liasü.