RSS indang Khristian wing

Küm 13 tejaklen Hindu tentet, Rashtriya Swayamsevak Sangh (RSS)-i Muslim Rashtriya Manch (MRM) tentettsüba ama Khristantem kongsang-a ka tentettsü nükjidong nung RSS-i Khristan lenirtem den senden ka amenba osang tawa asenoki osangkakettem nung züngshiogo. Iba dak sentakba nung yashi Syro Malankara Catholic Church-i, “Parnoki (RSS) kechisa latettsüdir onoki atatsü. Parnoki benokba nung ajemdaker ang ibaji agizüktsü mesüra magizüktsü,” ta shiogo. Item osang angashidang RSS-i parnok indang Khristan kongsang ka tentetnüba nükjidongji aser tangatetbaji kechi ta shisadanger. RSS-i tentetnüba Khristan tentetji MRM ama asütsü ta osang angazüker. Muslim nunger den amaliteptsü aser Muslim-Hindu tsüngda telongjem taliba akatsü nükjidong nung 2002 küm taoba RSS tongti, K.S Sudarshan lenisüba nung MRM ya tentetja liasü. MSM-i, Muslim nungeri RSS aser parnok den adenba tentettem dak mulung melemtetbaji tai, ta ashir. RSS-i benokba tangatetba onük aika MRM-i pusemer, aser iba nungji nashi tepsettsü nokdangba densema lir. 2009 küm Indianung Muslim tentet tulu ka tenüng agi, Jamiat Ulema-e-Hind-i, ‘Vande Mataram’ ya Muslim ken masü ta lemteta ayu, saka MRM-i iba nungji hai-haura makar. MSM National convener, Mohammed Afzal-i, “Asen Muslim adianutemi iba telemtetba nungji manidaktsüla, kechiyong Vande Mataram ya linük indang ken lir aser India senso ajaki ibaji akhümtsübutsüla aser atentsüla. Muslim nunger shirnoki iba ken atentsü memulunger, parnokji Muslim aser Indianaprong anemertem lir” ta ashi. 2014 Lok Sabha election nung Afzal-i, MRM-i BJP atema Muslim nunger nübo million 50 bosa yimtsütsü ta jembia liasü. 2002 küm Gujarat nung Muslim nunger anema rara tulu adokba ken o nung Modi densema aliba dak sentakba nung Afzal-i Modi pusema jembiogo. 2015 küm MRM-i yoga pusema “Yoga and Islam” kaket sayaa liasü. Iba kaket nung MSM-i ‘Yoga’ ya tamangba yimsü den sentaktepa mali ta zülua lir. BJP leniba kübok linük nung akhümtsübutep mali aser RSS ji sorkar nem shisa agütsür telok ta yimtenren party temi aitsüba mapang ka nung, aserIndia linük tesem balala nung Tenla ki aika raksatsüba sülen nungi Modi’er sorkari Khristantem dang junga benshitsü merangba mapang ka nung RSS-ia iba mera agir. Ajisüaka, Hindu tentettem aser sorkar asalendong nung Khristantem atema tongtibang anogotem nung sorkar sentong balala benokba anema Goa, Kerala aser Mizoram ama state temibo mapang shia ola adoker. Mizoram nung Arogo lenirtemibo tamangertem dang International Yoga Day mamungtsü tayongzükba agütsü, Deobar nü state nung election magitsü EC dang mepishi, December 25 nü ‘Good Governance Day’ amungba anema ola adok, iba den külemi Good Friday nü SC aser HC obendangertem senden ayongba anema lungkak aitogo. Mizoram sorkaribo, state nung tamangertem Khristmas aser New Year benjung amungtsü aser iba mapang nung ainertem memesütsü, anungji kanga tongtibang nisungtem aser sorkar tongti ketdangsertemi Dec. 14, 2015-Jan. 8, 2016 tsüngda official süa mesemdangdaktsüner ta mepishia liasü. Item onüktem ajanga Hindu nungeri tanga yimsütem aser talisa Khristantem hau ta maliba/mezüngshiba jungkai adoka sayur. India nung Muslim nunger aika lir aser parnokji longjemra Hindu nunger timtem ajurutsü ta tsübua bilemba agi RSS-i par kübok Muslim nunger telok kaji tentet asütsü akok. RSS kübok tentetba MRM jagi RSS pusema parnok tangatetba aser tetuyuba sülen anidaker aser ibaji ajanga linük nung Muslim nunger tsüngda meputep adokogo. RSS-i tenzüktsü aliba Khristan tentetji MRM amaji dang ka süra Muslim nunger ama Khristan tentet rongnunga mangatettep aser telemsa taliba adoktsü südi ta arendaka bilemer. Ashiko, MRM amaji Khristan tentet jagia nashi tepsetba nokdangba pusemtsüa akok, yoga pusemtsüa akok aser Hindu nunger tamangba yimsü tangatetba balala pusemtsüsa mapangi bener arutsütsü südi.