RSS ji Satras den tesentaktep mali: Acharya

Guwahati, December 22 (Agencies): Assam Angh mapa repa abensang, P B Acharya-i, RSS pur satras den tesentakatep mali, ta ashiba den külemi Assam nung neo-vaishnavite tamangba Centre tem nüngdak makaba nung yimtenren mangatettep nung dendaktsübaji kanga tia maka, ta ashi.
Chief minister Tarun Gogoi aser Congress lenir Rahul Gandhi nati, taoba hopta Rahul-i Barpeta satra semdangtsü aliba RSS-i nokdang ta aitsüba dak sentakba nung Acharya-i, satras semdangtsü atema ajak nem lapokja dang lir, ta ashi.
Guwahati, Jalukbari nung Bhupen Hazarika memorial semdangba mapang Angh-i, “Satras semdangtsü ajak nem temelaba agütsür. Atangji, tamangba yimsü balala ajak nung temzüng-ozüng karbo lateta lir. RSS pur satras den tesentaktep lir ta asübaji tai,” ta ashi.
Rahul-i Barpeta semdangba mapang RSS aser BJP-i tetsür kar ajungmesor Rahul-i Putu 16 buba mapang yangluba satra semdangtsü nokdang, ta Gogoi-i aija liasü. Iba dak alia Rahul-ia RSS nem kasa tai tonglokja liasü.
State Angh-i RSS nung inyaker ka ama inyaksangshir ta Gogoi-i aitsüba dak sentakba nung Hombar nü Acharya-i, RSS ya temzüng alema inyaker mesüra ozüng ajanga noktangba tentet ka masü, ta ashi.
“RSS agent tetezüji kechi (?) Ato kilonser Narendra Modi-a RSS pracharak ka liasü. RSS ya linük meimba tentet ka lir,” ta Acharya-isa ashi.