RSS lenir Gagneja dak injang kahloktsü

Jalandhar, August 07 (Agencies): Nisung kar motorbike nung arur RSS lenir, Jagdish Gagneja dak injang kahloktsüba sülen pa mejungi yirua lir, aser iba tatalokba bushisüngdangtsü atema züngsem pezüi akümba SIT ka tentetogo.
Yashi Punjab, Jalandhar, Jyioti Chowk tesem nung nisung  kari RSS (Punjab) tatong Tir, Gagneja dak injang kahloktsüba sülen nija hospital ka nung doctor temi pa tebok nungi injang ana agitetogo, ajisüaka ano injang kabo pa temang nungsa lir.
BJP lenir aser local MLA, Manoranjan Kalia-i, “Pa tebok nungi injang ana agitetogo, ajisüaka ano injang ka pa temesen anasa lir,” ta ashi.
Deputy Chief Minister, Sukhbir Singh Badal tetuyuba nung Punjab Director General of Police, Suresh Arora-i iba tatalokba bushisüngdangtsü atema Special Investigation Team (SIT) tentetogo aser police-ia iba tesem nung aliba CCTV noksa repdrangdar.
DGP IPS Sahota leniba nung SIT nung züngsemtemji Police Commissioner Arpit Shukla, Inspector General Counter Intelligence Jalandhar Neelabh Kishore aser Assistant Inspector General Amarjit Singh Bajwa nunger asütsü.
Ano külen BJP-i sorkar dang, kechiba state nung item ama tatalokba bulua ataloker, ta asüngdangogo.
Taküm January ita nunga Punjab, Ludhiana nung RSS nung inyaker ka amak, April ita nung Ludhiana nungsa taoba mapang Namdhari sect tongti kinüngtsü, Chand Kaur tepset aser May ita nung Ludhiana nungsa Sikh sayutsüngir, Ranjit Singh Dhadrianwale tepsettsü meranga liasü.
BJP National Secretary, Tarun Chugh-i osangbenertem dang, “Onoki state sorkar dang iba ya (Ganeja amakba) süoki ia bushisüngdangtsü aser  aibelener nem temerenshi tulu agütsütsü takhangba agütsüogo,” ta metetdaktsü.