RSS lennirtem nem Khristmas tenokdangba agütsü

Lucknow, December 22 (Agencies): Aligarh nung okadak kati RSS lennir pungu dang December 25 nü Uttar Pradesh nung aliba missionary school aser tenla kitem telongtet metre 500 adena maotsü tetuyuba agütsü.
Parnoki Hindu nunger kaketshirtem dang Khristmas mamungtsü atema amokmerenba sülen iba tetuyuba agütsü.
Hindu Jagran Manch zonal convener Amit Raj, city president Sonu Savita, city general secretary Punit Sharma aser züngsemtem Sanju Bajaj o Bablu Sani nunger nem Additional city magistrate Renu Singh-i iba tetuyuba agütsü.
Renu Singh-isa police dang par pungu Hokolbarnü okadaki anir arutsü tetuyuba agütsü.
Parnok ajaki bail atema sen lakh 1 indang personal bond agütsütsü mesüra parnok aputsü ta magistrate-isa oshidang agütsü.
Khristantem kari ken o benokba ajanga local intelligence unit-i bushisüngdang asüba sülen Manch lennirtem nem iba tetuyuba agütsü ta police-i ashi.
Khristmas benjung nung Manch lennir 5 ji missionary school aser tenla kitem telongtet metre 50 tashi nungdang ngura aser timtem kar danga ajurura, iba tebilemtsüji par pungui abentsü, ta okadakisa metetdaktsü.
“Khristmas mapang Hindu nunger kaketshirtem Santa Claus ama tashiyim agi sübodaktsüba school tem anema dang onoki tenokdangba agütsü. Onoki ibaji matalokdaktsütsü” ta Sonu Savita-i osangbener dang ashi.
“Khristantemi Khristmas amungba onoki menokdanger, saka missionary school temi Hindu kaketshirtem nem tashiyim agi benjung memungdaktsütsüla” ta Sanju Bajaj-ia ashi.