RSS nung inyakertemi tekülem kidangi aitsü nokdang: Rahul

New Delhi, December 14 (Agencies): Hombar nü Congress lenir Rahul Gandhi-i, tawa pai Assam semdangba mapang Barpeta nung pa tekülem kidangi aitsü Rashtriya Swayamsevak Sangh (RSS) nung inyakertemi nokdang, ta ashiba den külemi paisa, iba ama BJP yimtenren inyakyim ya tagizüktettsüla masü, ta ashi.
Tejashi nung Congress tatong Tir Rahul-i, pai onük asem benokner ta shia Mongolbar nü Kollam (Kerala) nung Ato kilonser Narendra Modi-i sentong ka nung Kerala chief minister Oomen Chandy mejaok, aser ibaji ajanga Modi-i state nung aliba nüburtem mezüngmeshiogo, ta ashi.
Parliament kima Congress lenirtem lungkak aitba mapang osangbenertem den jembidang Rahul-i, “Ni Assam semdangba mapang ni Barpeta district nung tekülem ki ka semdangnüa liasü. Ajisüaka tekülem kidangji RSS züngsemtemi ni telungi aitsü memelai nokdang. BJP-i iba ama ya inyaker,” ta ashi.
“Parnoki tetsürtemji kü jakdang nokdakdaktsü aser kü dang, nai tekülem ki telungi aitsü makok ta ashi,” ta Rahul-i jashia ashi.
“Ni nokdangtsüsa parnokiji shirnok (?),” ta paisa ashi.
Hokolbar nü Rahul-i Barpeta semdanga liasü aser pai, tesülen RSS nung inyakertem senshir sülen ni tekülem kiji semdang, ta ashi.
Deobar nü Assam chief minister Tarun Gogoi-i, BJP aser RSS züngsemtemi Rahul Barpeta Satra telungi aitsü memela, ta tai tonglokja liasü.
Deobar nü Assam chief minister Tarun Gogoi-i, BJP aser RSS züngsemtemi Rahul Barpeta Satra telungi aitsü memela, ta tai tonglokja liasü.
Ano BJP-ia Congress tatong Tir ya “tiyazü jembiba gol ka lir’ ta aitsüogo.
Union Minister Venkaiah Naidu-i, “RSS-i tekülem kitem acha ayanger asü (?) Iba ya tamangtsü mali. Iba ya yimya ka kümogo,” ta ashi.
Kerala chief minister Chandy dak sentakba nung Rahul-i, sentong ka nung ozü chief minister adentsü nokdangba ajanga Ato kilonseri Kerala nüburtem mezüngmeshiogo, ta ashi.
“Kerala Chief minister ji nüburtem tenüng nung lir. Kerala Chief minister olaji Kerala nüburtem ola aser Ato kilonseri iba olaji mezüngmeshiogo. Iba ya onoki magizüktettsü,” ta Congress lenirisa ashi.
Tan hopta SNDP-i ayongzüka Kollam nung Ato kilonseri taoba mapang chief minister R Sankar indang kürakyanglu sayatsüba sentong nung Kerala chief minister mejaok aser iba dak sentakba nung Chandy-i sangdong ka ajanga pa iba sentong nung mejaokba atema kanga mepelar, ta shiogo.